Къайгъыланы къалай чачаргъа боллукъду?

Къайгъылы болуу шёндюгю заманны баш ышанларындан бириди, баям. Тёгерек-баш жарсыулу хапарладан, осал ишледен толгъан кезиуде адам кесин къалай сакъласын?

- Терезени ачыгъыз. Стакан суу ичигиз. Солуу гимнастика бардырыгъыз: хауаны бурунунг бла тартып, аз-аздан аузунг бла чыгъарып. Бек аздан, аны кюннге 5 кере этерге керекди,-деп юйретедиле  психология жаны бла экспертле.

Дагъыда мен неден къоркъама, деген сорууну берирге эмда анга жууапны излерге да боллукъду. Ол а бир кесек тынчайыргъа болушады.  Адам кючюн салып бир иш бардырса да хорлаяллыкъды  къайгъылыкъны. Сёзге, юйде  тазалыкъны жалчытыргъа да болады.

 Бир-бир психологла уа   къоркъгъан затланы къагъытда жазып, аланы сюзерге кереклисин да айтадыла. Жунчурча затламыдыла ала, неда адам кесин керексизми къозутады? Кертиси бла да, къоркъгъан затны юсюнден  кёлден айтыргъа, сагъыш этерге базынмаулукъ адамны бютюнда къайгъылы этерге боллукъду.

Сагъышладан жашаугъа, шёндюгю болумгъа терк къайтыр ючюн а кёлден сёлеширге керекди, сёзге атынгы, тукъумунгу айтыргъа, ненча жылынг толгъанын, шёндю къайда тургъанынгы, отоуну ичинде нени кёргенинги санаргъа да жарайды. Ол кезиуде аман, осал сагъышланы  чачып, керти жашаугъа теркирек къайтыргъа онг барды. Алай бу затла жаланда къысха заманнга тынчайыргъа болушадыла. Къайгъыла, сагъышла, керексиз оюмла къуруда къыйнагъанла специалистге барыргъа кереклисин чертедиле экспертле.

Жашауугъузну мутхуз этген, даулашып тургъан, тюнгюлтген адам бла ушакъны терк бошап, аны къатындан кете билирге керекди.   Даулашны, демлешиуню ахыры боллукъ  тюйюлдю, алай ол адамны кёлюн аман этеди, жюрегин къыйнайды, къайгъырыулукъну бютюнда кючлейди.

Бюгюнлюкде бизге информацияны кёплюгюню заманында жашаргъа тюшгенди. Телевиденияда, Интернетде тюрлю-тюрлю хапарла кёпдюле, алагъа тынгылап тургъан адамны сулугъу осалгъа бурулмай къалмайды. Аны хатасындан жашау болумла бузуладыла, адамла психика жаны бла басыулукъну ауурлугъун кётюралмайдыла. Аллай   сезимлери  болгъанланы къайгъыларын жаланда психологла жайыкъландыраллыкъдыла, дейдиле экспертле.