Фермерлени онгдурадыла

Къабарты-Малкъарда фермерлеге, «Агростартап» грант программаны хайырындан, быйыл 54 миллиондан артыкъ сом берилликди. Республиканы Эл мюлк министерствосундан билдиргенлерине кёре, ахча «Гитче эмда орта предпринимательство, сора дагъыда энчи предпринимательство башламчылыкъгъа себеплик этиу» деген миллет проектни чеклеринде бёлюнюрюкдю.

Ырысхыны кёп къалмай барысын да (53,5 миллион сом) федерал бюджетден жиберликдиле, республика да кеси атындан 540 минг сом къошарыкъды. Грант алыргъа боллукъланы санына быйыл эсепге тургъан КФХ-ладан бла энчи предпринимательледен сора иели мюлклери болгъанла да киредиле. Алагъа быллай излем барды: ахча къоллу болгъандан сора 30 кюнню ичинде энчи предприниматель деп къырал эсепге турургъа керекди. Конкурсха жаланда ары дери бир тюрлю грант, субсидия неда башха тюрлю финанс болушлукъ алмагъанла къатышыргъа боллукъдула.

Ахча алгъанла аны проект документацияны жарашдырыргъа, суу, газ, жылыу сетьлеге къошулургъа, эл мюлк техника эмда автотранспорт, продукция чыгъаргъан, жарашдыргъан эмда сакъларгъа онг берген оборудование сатып алыргъа къоратыргъа неда кредитлерин жабаргъа эркиндиле. Дагъыда грантха малла, юй къанатлыла, чабакъчыкъла, зыгытла алыргъа боллукъду.

Конкурсда хорлап, къыралдан ырысхы  алгъанла эм азындан беш жылны ичинде ишлерге, жангы ишчи жерле къураргъа, проектде белгиленнген кёрюмдюлени болдурургъа борчлудула. Документлени алыу 21 мартдан башлап 11 апрельге дери барлыкъды.