Инвестиция проектлеге болушлукъ этилликди

  «Кавказ.РФ» акционер общество Шимал - Кавказ федерал округну бизнесменлерини тилеклерине кёре  туризм бла байламлы инвесторлагъа болушлукъгъа деп, оператив штаб къурарыгъын билдиргенди. Андан сора да,  ала тыш къыраллы санкцияла  ючюн  къурулушлары  тохтагъан объектлеге да ахча бла себеплик  этерикдиле. Былайда сёз ишлери ахыр стадиягъа жетгенлени юслеринден барады.

 Алай бла озгъан ыйыкъда обществону келечилери бир ненча тюбешиу бардыргъандыла. Резидентле эм инвесторла бла кенгешле ётгендиле. Аланы кезиуюнде «Эльбрус», «Архыз», «Ведучи» эм «Мамисон» курортлагъа жууукъ кезиуде 5 миллиард сом чакълы болушлукъ этиллигини юсюнден айтылгъанды.

 Бюгюнлюкде «Кавказ.РФ» общество 60 миллиард сом багъасы 20 инвестиция проектге къарайды. Аланы жашауда бардырыу Шимал Кавказда 10 минг чакълы ишчи жер ачылырына себеплик этерикди. Ала жаланда туризм бла байламлы тюйюлдюле. Проектлени араларында агропромышленность эм промышленность сфераланы айнытыу бла байламлыла да кёпдюле.