Регионла аралы правительстволу комиссияны жыйылыуу болгъанды

КъМР-ни Башчысы Казбек Коков Москвада Регионла аралы правительстволу комиссияны селектор жыйылыууна къатышханды. Ол РФ-ни Правительствосуну Председателини орунбасары Марат Хуснуллинни башчылыгъында ётгенди.

 Жыйылыуда сёз регионлада миллет эм федерал проектлени касса толтурулууларыны, ол санда  къаллай бир процентге дери эм инвестицияла бла ишлеулерини юсюнден баргъанды, деп билдиргендиле республиканы оноучусуну пресс-службасындан.

-Къабарты-Малкъарда миллет проектле, ол санда хар объект, энчи къабыл этилген тизмеге кёре бардырыладыла,- дегенди республиканы оноучусу.

-Быйылгъы жылда 70 социал магъаналы объектни къурулушун башларгъа эм тынгылы ремонтун этерге деп турабыз.  Белгиленнген ишлени асламысын 2022-2023 жыллада бошарыкъбыз, уллу объектледе къурулушла 2024 жылда  тамамланырыкъдыла. Бюгюнлюкге Нальчикде 500 адамны бир ызгъа алгъан поликлиниканы, Куба элде амбулаторияны, Элбрусда участкалы больницаны, элледе билим берген юйлени къурулушларын  башларгъа къырал келишимле этилгендиле. КъМР-ни Башчысы тамамланырыкъ ишлеге  эм толтуруллукъ келишимлеге контрольну къатландырыргъа буюруу бергенди.

Казбек Коков инфраструктура къурулушланы юсюнден да айтханды: «Федерал арада «Таза суу» деген проектни чеклеринде къошакъ келишимле этерге онгла излейбиз».

 2022-2024 жыллада алгъын кезиуледе хайырланыргъа берилген 19 объектни юсюне энтта да суу бла жалчытхан эм суу барлыкъ ызлагъа саналгъан 13  объектни къурулушу бардырыллыкъды.  Андан сора да, Терекде  бла Тырныауузда  суу берген беш объектни къурулушуна федерал бюджетден ырысхы алыргъа къагъытла хазырлана турадыла», - деп ангылатханды КъМР-ни Башчысы.