Республика халкъла аралы кёрмючге къатышады

Бюгюн Москвада «Крокус Экспо» кёрмючле бардырыучу арада 28-чи туризм жаны бла халкъала аралы MITT-2022 деген кёрмюч ишин башлагъанды.

Аны чеклеринде Россейни алтмышдан аслам региону кеслерини турист жаны бла продуктларын эм къаллай жумушла тамамлагъанларын кёргюзтедиле.

Кёрмючню ишине Азербайджандан, Армениядан, Белоруссиядан, Венесуэладан, Египетден, Индиядан, Къазахстандан, Къыргъыздан, Къытай халкъ республикадан, Таджикистандан, Таиландтан, Тюркден, Узбекистандан эм Филиппины къыралдан келечиле къатышадыла. Ары дагъыда биринчи кере  Алжирни, Индонезияны эм Кенияны келечилери келгендиле, деп билдиредиле республиканы оноучусуну пресс-службасындан.

Къабарты-Малкъарны халкъла аралы кёрмючде республиканы курортла министерствосу кёргюзтеди, регионну келечилерине  сагъынылгъан министерствону башчысы Мурат Шогенцуков таматалыкъ этеди. 

Республиканы  стендинде Минги тауну эм аны бийиклигин белгилеген сурат  турады. Анда дагъыда тау лыжала, альпинизм, парапланеризм, треккинг, курортларыбызны онглары, автотуризм эм солуу жаны бла республиканы башха жерлери да кёргюзтюлгендиле.

 Кёрмючде регионну турист бёлюмлерин туура этгенлерини санына  «Жолучулукъ», «Эльбрус турс», «Чайка» санаторий, «Кавказ»,  "Юг-вояж» турист  компанияла эм башха акционер обществола киредиле.  Республиканы келечилери тюрлю-тюрлю-регионладан келген адамла  бла тюбеширикдиле, байламлыкъланы жюрютюрге  келишимле этерикдиле.

Башда сагъынылгъан кёрмюч битеу дунияны турист компанияларына Россейни ичинде кеслерини продуктларын кёргюзтюрге эм уллу иш майданнга саналады. Анга къатышханлагъа дунияны турист ассоциацияларыны эм ол жаны бла оноу этген компанияланы келечилери бла тюбеширге онг барды. Андан сора бу кёрмюч жыл сайын регионланы видеороликлерини конкурсун бардырады, анда ала кеслерини турист жаны бла онгларын толусунлай кёргюзтюрге боллукъдула.  Кёрмючню сайтында бардырылгъан къол кётюрюуге кёре, ким хорлагъаны да белгили боллукъду. Он жетинчи мартда конкурсда хорлагъанланы саугъаларыкъдыла.

Иш байламлыкъланы тохташдыругъа да кёрмючде аслам магъана бёлюннюкдю.  Тюрлю-тюрлю конференциялада ата журтлу турист онгланы толусунлай хайырланыргъа, туризмге цифралы технологияланы сингдирирге эм битеу башда сагъынылгъан бёлюмню ишин къыйматлы этерге   жоралланган соруула кётюрюллюкдюле.

   Бизни корр.