Окъуучула бла ачыкъ ушакъ

Черек районну администрациясыны  башламчылыгъы бла бу ауузну битеу эллеринде да  терроризмге, экстремизмге къажау кюрешге, саулукълу жашау халны бардырыугъа, культураны айнытыугъа, мамырлыкъны бла келишиулюкню кючлендириуге  жораланнган жыйылыула жылгъа эки кере   бардырыладыла.   Аллай кезиулю тюбешиу бу кюнледе  Къашхатауда да ётгенди.  Анга район администрацияны башчысыны орунбасары Улбашланы Сахадин, прокурор Тимур Хавпачев, Къашхатауну таматасы Уяналаны Азрет, иймам Мецелланы Алик,  школчула да къатышхандыла.

Сахадин Азнорович  окъуучулагъа терроризм келтирген хатаны эм анга къатышханла къаллай жууапха тартыллыкъларыны юсюнден тынгылы хапар айтханды.  Аны бла бирге ол ислам динни сылтауу  бла  законсуз ишле этерге жарамагъанын да эсгертгенди. Абаданлагъа, тиширыулагъа, башха миллетлени эмда динлени келечилерине   хурмет эте, сый-намыс бере билирге  да чакъыргъанды.

Тимур Хажмуратович а  сабийлеге  школда кёл салып окъурларын, тизгинли болурларын, кёпню билип, жетишимли жашау этерлерин,  жамауатха да  жарарча адамла болуп ёсерлерин тежегенди. Алик Аскербиевич  ата-аналарыны, устазларыны  айтханларындан чыкъмазгъа, огъурлу ишле этерге итинирге, ариу къылыкълыла болургъа,  къарыусузгъа, амалсызгъа болушургъа керек болгъанларын эслерине салгъанды.

Тюбешиуню ахырында уа окъуучула, абаданладан кёп хайырлы шартла эшитгенлерин айтып, алагъа ыразылыкъларын билдиргендиле.

Бёзюланы Залина, Черек районну администрациясыны пресс-службасы.
Поделиться: