Саулукълу продукцияны белгиси боллукъду

Бу айны биринчисинден башлап Россейде «Бютюнда иги эл мюлк продукцияны, сырьёну эмда аш-азыкъланы» юсюнден закон кюч алгъанды. Ол быллай товарланы рыногун айнытыу эмда аланы кёпле хайырланырча онгла къурау хыйсап бла жарашдырылгъанды, дегендиле Эл мюлк министерствода.

Бу закон бла аллай эм иги продукциягъа не затны санаргъа боллугъу, аланы чыгъарыугъа излемле да тохташдырыладыла. Анда экология, санитар-эпидемиология, ветеринар эм башха излемлеге келишген, кеслери да тёгерекдеги къудуретге бек аз хата салгъан агропромышленность эм башха технологияланы, жангыдан хайырланыргъа боллукъ материалланы, генетика инженерия, клонирование, радиация дегенча аллай затлагъа чек салыуну юсюнден айтылады.

Россейни Эл мюлк министерствосу «Жашил эталон» деген белгини иесиди. Сагъынылгъан продукцияны юсюне ма ол салынырыкъды. Предприятиялагъа аллай эркинлик сертификат алгъанларындан сора берилликди. Бу жумушну шёндю Роскачество тындырады.

«Жашил» стандартизация бла кюрешген, кеси да бу ведомствону мурдорунда къуралгъан комитет миллет стандартланы алтысын жарашдыргъанды. «Экология балансха сакъ болуугъа эмда саулукълу аш чыгъарыугъа арт жыллада уллу эс бурулады. Органика продукциягъа предприятияланы эмда хайырланыучуланы жанындан сурам ёсе баргъанын кёребиз. Быллай продукциягъа не зат саналгъанын эки жыл мындан алгъа белгилегенбиз. Бюгюнлюкде Россейде тийишли сертификатны жюзден артыкъ предприятие алгъанды. Ышанама «Жашил эталон» деген белгиси болгъан продукциягъа сурам иги болуруна. Мен оюм этгеннге кёре ол качествону бийик стандартына шагъатлыкъ этерикди, кеси да алыучугъа артыкъ багъа боллукъ тюйюлдю», - дегенди РФ-ни эл мюлк министрини орунбасары Максим Увайдов.