Миллет проект къалай толтурулгъанына, ол санда оюлургъа къоркъуулу юйледен кёчюрюу къалай баргъанына къаралгъанды

  КъМР-ни Башчысы Казбек Коков Регионланы айнытыу жаны бла правительстволу комиссияны президиумуну жыйылыууна къатышханды. Кенгешни РФ-ни Правительствосуну вице-премьери Марат Хуснуллин бардыргъанды. Анда  «Жашау журтла эмда шахар болум» миллет проект къалай толтурулгъанына, ол санда оюлургъа къоркъуулу юйледе жашагъанланы тынгылы журтлагъа кёчюрюу къалай баргъанына къаралгъанды.

  Марат Хуснуллин билдиргеннге кёре, адамланы эски юйледен кёчюрюу иш  болжалындан алгъа барады. Ол былтыр сентябрьде Россейни Президенти Владимир Путин оюла тургъан юйледен россейлилени кёчюрюуню терклендирирге деп, аллай бороч салгъанын эсгертгенди. Аны бютюн тынгылы толтурур ючюн, Правительство талай амалны бла башламчылыкъны хазырлагъанын айтханды.

  Къабарты-Малкъарда 2022 жылда битеу да  512 минг квадрат метрни хайырланыргъа берирге белгиленеди. Жашау журтланы, ол санда энчи иелилени, къурулушларын бардырыргъа кёллендирир мурат бла республикада  инфраструктура жаны бла къырал программалада белгиленнген ишле да тамамланыладыла. Алайды да, 2022-2024 жыллада Нальчикде жангы юйле ишленнген тийреледе суу эмда газ  ызла тартыллыкъдыла, жолла ишленирикдиле, арбазла айбатландырыллыкъдыла.

 Жыйылыуну эсеплерини юсюнден айта, Казбек Коков 2017 жылны 1 январына дери эсепге тюшген юйледен кёчюрюуню  2019-2023 жыллагъа деп жарашдырылгъан программасы биринчи кварталда, болжалындан алгъа, толтуруллугъун чертгенди. «Ал  тёрт жылны ичинде  62 эски юйден 1034  адамны кёчюрюрге белгиленнген эди, алай шёндю окъуна 547 инсан тынгылы журтла бла жалчытылыннганды. Энди 487 адамны къалгъанды  кёчюрюрге»,- дегенди ол.

Республиканы оноучусу айтханнга кёре, ол программада кёргюзтюлген  кёп фатарлы юйле хайырланылыргъа берилгендиле, фатарланы иеликге алырча къагъытла жарашдырыла турадыла. «Аны бла бирге 2017 жылны 1 январындан башлап 2020 жылны декабрине дери эсепге алыннган къоркъуулу юйлени азайтыу жаны бла программа да жарашдырыла турады. Битеу да 19 кёп фатарлы юйден 1861 адамны кёчюрюрге мурат этиледи. Ол программаны болжалындан алгъа тамамлауну онгларына да къарай турабыз»,- дегенди Казбек Коков.