Хайырланыучуланы эркинликлерин эм башына салып

Роспотребнадзорну Къабарты-Малкъарда бёлюмюне гражданладан, къырал эмда жер-жерли власть органладан, предприятияладан бла организацияладан, жамауат биригиуледен былтыр 632 обращение келгенди. Аланы кёп къалмай барына да толу жууапла берилгендиле, энтта да 56 письмо уа башха органлагъа жиберилгенди, деп чертгендиле ведомствону пресс-службасында.

Письмолада жазылгъаннга эмда телефон бла сёлешип айтылгъаннга кёре Роспотребнадзор кёп къалмай токъсан тинтиу иш бардыргъанды. Сёз мында санитария эмда хайырланыучуланы эркинликлерин къоруулау жаны бла законодательстволагъа бузукълукъ этилгенни эмда этилирге боллугъуну юсюнден барады. Анга кёре эмда КоАП-ха тийишлиликде, предпринимательлеге, къуллукъчулагъа эм башхалагъа 80 административ иш ачылгъанды. Дагъыда предприятиялагъа бла организациялагъа эмда энчи предпринимательлеге бузукълукъ этерге сакъ болугъуз деп 126 эсгертиу жиберилгенди.

Хайырланыучуланы эркинликлерин къоруулау жаны бла консультация болушлукъ излегенле Роспотребнадзоргъа бу телефон номерле бла сёлеширге боллукъдула: 8(8662) 42-03-32, 42-16-64. Санитария-эпидемиология таплыкъ бла байламлы соруула бла: 8(8662) 40-38-99, 42-30-31, 42-69-48, эпидемиология соруула бла уа: 42-53-14, 42-76-14, 42-19-83.

Дау къагъыт неда исковой заявление жазаргъа сюйгенле Роспотребнадзорну консультацияла берген арасына 8(8662)74-28-28 номер бла сёлешсинле. Аллай къагъытланы юлгюлерин эмда кёп тюрлю магъаналы информацияны http://zpp.rospotrebnadzor.ru/ сайтда да табаргъа боллукъду.