«Акъыллы эл мюлкню» къурар муратлыдыла

Россей Федерацияны регионларында илму-производстволу кооперацияны системасын къурау жаны бла проектни къыйматлы тамамлар умутда Кърым республикада эл мюлкню илму-излем институтунда регионла аралы кенгеш бардырылгъанды кёп болмай. Аны РФ-ни Илму эм бийик билим бериу министерствосу бла Илмуланы россей академиясы къурагъандыла. Бизни республикадан анга Къабарты-Малкъар къырал аграр университетни келечилери къатышхандыла: профессор Ирина Ханиева, агрономия факультетни студенти Ахмед Саболиров бла аспиранты Астемир Алоев, деп билдиргендиле вуздан.

Проектни баш магъанасы къыралны субъектлеринде «Акъыллы эл мюлк» деген концепцияны къурау бла байламлыды. Аны хайыры бла регионла илму, экономика, социал эмда технологияла жаны бла тирирек айнып башларгъа керекдиле деген оюм барды.

Алай бла институтда эки кюнню ичинде бир ненча пленар эмда эксперт сессияла, «тёгерек столла» болгъандыла. Андан сора къонакъланы учрежденияны илму-излем ишлерини эсеплери бла шагъырейлендиргендиле. Къабарты-Малкъарны келечилери уа коллегаларына университет хорлагъан грантланы жашауда жетишимли бардыргъаныны  юсюнден билдиргендиле.

Кенгешни чеклеринде КъМКъАУ-ну бла институтну арасында илму-техника жаны бла байламлыкъла къурарча келишим этилгенди. Анга кёре эки учрежденияны алимлери эмда университетни аспирантлары, магистрантлары бла студентлери битимчилик эмда жерчилик, селекция эмда урлукъчулукъ сфералада бир-бирлеринде ахшы сынам бла шагъырейленирикдиле.

Ол кюн окъуна институтну келечилери КъМКъАУ-дан коллегаларына дарман хансланы бла жаулу битимлени урлукъларын бергендиле.