Аланы Хорламгъа итиниулюк, шуёхлукъ, Туугъан журтубузгъа сюймеклик бирикдиргенди

23 февраль – Россейде Ата журтну къоруулаучусуну кюню

23 февраль Ата журтубуз ючюн жанларын аямагъанланы, бюгюнлюкде да мамырлыкъны сакълагъанланы байрамыды. Былтыр а Уллу Ата журт урушда ёлген жерлешлерибизни атларын ёмюрлюк этген магъаналы иш болгъанды.

Элбрус районнга баргъанда, Кёнделеннге кирген жерде «Скорбящий горец» деген мемориалны кёпле биледиле. Бу эсгертме Къабарты-Малкъарны энчи белгилеринден бириди дерге да боллукъду.   Уллу Ата журт урушда совет халкъны Хорламыны 70-жыллыгъы белгиленнген кезиуде былайда жигитлерибизни хурметине жангы мемориал ачылгъанды.

Анда къанлы къазауатдан къайтмай къалгъан 756 кёнделенчини аты-тукъуму жазылып, ала ёмюрлеге халкъны эсинде къалырча этилгендиле. Аланы арасында уа къуру таулула угъай, къабартылыла, оруслула, эрменлиле, башха миллетлени келечилери да бардыла. Бу жашланы уа барысын да бир зат бирикдиргенди – Хорламгъа итиниулюк, шуёхлукъ, къарындашлыкъ, Туугъан журтубузгъа сюймеклик.

Бу комплекс районда бек уллуладан бириди. Аны кенглиги 4,6 минг квадрат метрден асламды. Жигит жерлешлерибизни  атлары уа жыйырмадан аслам къара мермер ташда жазылыпдыла. Комплексни ишлетиуню  башламчылары  Кёнделенни Жамауат советини келечилеридиле,   КъМР-ни Башчысы Юрий Коков, бу ишни магъаналылыгъын белгилеп, элчилеге болушлукъ этген эди. Республиканы  толтуруучу власть органлары бу жумушлагъа 3,5 миллион сом бёлгендиле, къурулушха Кёнделен элни администрациясы да  кесини юлюшюн къошханды – 70 минг сом.

Мемориал «Прохладный-Эльбрус» федерал жолда орналыпды, алай бла бу жол бла Минги таугъа баргъан туристле, районда жашагъанла да, Ата журтубузну къоруулай  жанларын-къанларын аямагъан жигитлерибизге баш урургъа, алагъа хурмет этерге боллукъдула.

 Кёнделенден Уллу Ата журт урушха 1500 адам кетгендиле.