Тыш къыраллы номерлери бла тутулгъандыла

«Тыш къыраллы номер» рейдни кезиуюнде автоинспекторла жюзден аслам бузукълукъну ачыкълагъандыла. Энчи стоянкагъа 23 машина салыннганды.

 Полициячыла он кюнню ичинде бардыргъан энчи жумушланы кезиуюнде машиналарын къырал эсепге салмай, тыш къыраллы номерле жюрюгенлери бла байламлы 123 бузукълукъну ачыкълагъандыла. Ол санда 87 кезиуде транспорт къырал эсепге салынмагъанды, 7 водитель бу бузукълукъну къайтарып этгенди. Дагъыда 29 водительни Таможня союзну келишимлерине кёре документлери жокъ эди.

Ичип, жолгъа чыкъгъан – уллу къоркъуу

 «Кеф водитель» энчи рейд эсирип жолгъа чыкъгъан водительлени бузукъчу ишлерин тохтатыр мурат бла бардырылады. Кезиулю профилактика жумушла озгъан байрым кюнде болгъандыла.

Кеф водительле эмда транспортну жюрютюрге эркинликлери болмай жолгъа чыкъгъанла башхаланы саулукъларына бла жашауларына къоркъуу салгъанлары баямды. Бу жол а автоинспекторла     18 кеф инсаннга машинасын жюрютюрге чек салгъандыла, энтта 21 водительни правалары жокъ эди. Аланы асламы уа «Кавказ» федерал жолда, Лескен, Терк эм Зольск районлада тохтатылгъандыла.

Ол кюн полициячыла жолда жюрюуню жорукъларына башха бузукълукъланы да ачыкълагъандыла. Право низамны сакълаучула ангылатыу жумушла бардыргъандыла, эсирген жолда жюрюуге къатышханлагъа къаллай къоркъуу салгъанларын эсгертгендиле.

 Кеф водительле этген аварияланы хатасы артыкъда уллуду. Быллай бузукъчу  административ эм уголовный жууапха тартылгъанын эсгертирге сюебиз. РФ-ни Административ бузукълукъланы кодексини 12.8-чи статьясыны 1-чи кесегине тийишлиликде, эсирген, неда медицина тинтиуледен ётерге унамагъан инсанны машинаны жюрютюрге эркинлиги 2 жылгъа дери сыйырылыргъа, энтта 30 минг сом тазир салыныргъа боллукъду.

Кеф болуп жолда къайтарылып тутулгъан а 200-300 минг сомун тас этерге хазыр болсун, дагъыда аны эркинлиги 2 жылгъа сыйырылады, неда ол борчлу халда хакъсыз ишлеге тартылады – 480 сагъатны.