Кёп фатарлы юйню ремонту ючюн тёлеуде льготала

Фатарлары болгъанла аллай юйге тынгылы ремонт этиу ючюн тёлерге борчлудула. Алай пенсиячыла уа аны азыракъ берирге боллукъдула. Законда айтылгъаныча, алагъа аны экиден бирине азайтыргъа, бирде уа (РФ-ни Жашау журт Кодексини 169 статьясыны 2.1 кесегине тийишлиликде) саулай кетерирге амал барды.

Пенсиячыгъа 70 жыл толса, аны быллай тёлеуюню экиден бирин къайтарадыла. Жыл санлары 80 болгъанла уа андан толусунлай эркин этиледиле. Алай болурча фатар пенсиячыны иелигинде турургъа керекди. Ол кеси да анда жашаргъа, тёлеуню да кеси берип турургъа тийишлиди. Андан сора да бу излемледен бири окъуна толтурулургъа керекдиле:

- пенсиячы жаланда кеси жашайды эмда бир жерде да ишлемейди;

- пенсиячы башха жууукълары бла бирге жашайды, алай ала да пенсиягъа чыгъып неда сакъат болуп (1 неда 2 группа) бир жерде да урунмайдыла.

Льготаны юсюнден айтханда, бир затны ангыларгъа керекди: анга тийишли болгъан инсан тёлеуден эркин этилмейди, алай ол берген ахчаны бир кесеги уа артха кесине къайтарылады. Иш алай болурча МФЦ-гъа барып заявление берирге керекди.

Талай федерал законла бла кёп фатарлы юйню ремонтуна тёлеуню бир кесегинден ма бу къауумла да эркин этилирге боллукъдула: сакъатла (1 неда 2 группала), сакъат сабийле, аллай сабийлери болгъан гражданла, СССР-ни эмда РФ-ни Жигитлери, Махтауну орденини толу кавалерлери, Уллу Ата журт урушха къатышханла, анда сакъат болгъанла эмда аланы юйдегилери, аскер къаугъалагъа къатышханла эмда алада сакъат болгъанла, Чернобыль АЭС чачылгъаны ючюн хата сынагъанла эмда аланы юйдегилери.

Льгота къауумгъа кирген пенсиячыла, жыл санларына да къарамай башхаладан эсе азыракъ телейдиле.