Фахму тас болуп да кетеди, къыйынынг а - угъай

Спорт бла кюрешген жашларыбызны, къызларыбызны хорламларын кёрсек, айхайда, къууанабыз. Алай хорламлагъа жол а тынч тюйюлдю – кёп затха чыдаргъа, къуру да чыгъа тургъан чурумлагъа къарамай, алгъа барыргъа керекди. Аллай жашларыбыздан бири  Алтууланы Магометни бла Гадийланы Ануарны къызы Клюзаны жашлары Асланды. Ол Огъары Малкъарда туугъанды, ёсгенди, школну да анда бошагъанды. Нальчикде Къабарты-Малкъар къырал университетде юридический жаны бла усталыкъ алгъанды. Болсада, жашауун а спорт бла байлар муратлыды. Гёжеф жарау этеди, бизнесин бардырады, юй бийчеси  Мамийланы Жамиля бла юч сабийни ёсдюреди.

  Спорт бла ол кесин таныгъанлы бери кюрешеди. Кёбюсюнде боксдан жарау этгенди, бир кесекни тутушуп да кёргенди. Боксдан биринчи тренери Гузоланы Асхат болгъанды, спортха жолун ол ачханды. Андан сора Эндрейланы Дауутну къолунда юйреннгенди, ол физкультурадан да устазы эди.  Студент заманында да боксну унутмагъанды - Хапаланы Салихде жарау этгенди. Ол, башха-башха школлада спорт залланы арендагъа алып, алай юйретгенди. Кюндюз окъууда тургъанды, ингирде уа – залда. Эришиулеге школ заманындан бери да къатышханды, республикалы турнирледе хорлагъанды. Алай профессионал халда эришип а алгъаракълада къатыш единоборстволадан башлагъанды.

Анча жылны спортну башха-башха тюрлюлери бла кюрешгени единоборстволада жарауларына да себеплик этгенди, нек дегенде анга карате, бокс, тутушуу да киредиле. Алай неден да бек а бокс бла кюрешгени болушханды. Единоборстволада жорукъла жокъдула дегенликге, ала бардыла. «Бир-эки жылны Тюменланы Альберт, аны бла жарау этгенле бла юйрениу-жарау этиу жыйылыулагъа бара тургъанма. Кертисин айтханда, единоборстволагъа Альбертни юсюнден эшитгенден сора эс бургъанма, ол кёплеге юлгю болгъанды. Бюгюнлюкде тюйюшню ММА тюрлюсю бла кюрешеме, Бабугентде, Минги тауда жараулагъа Альберт бла барыучума», - дейди Аслан. 

ММА-да эришиуледе сынаууну юсюнден айта, ол Ставропольда болгъан турнирни эсгереди. Анда рингге 70 килограмм ауурлукъ категорияда чыкъгъанды. Спортну башха тюрлюлериндеча болмай, мында бир ауурлукъ категорияда жангыз экеулен тюйюшедиле. Бир кесек аууруракъ тартханы ючюн, терк окъуна арыгъыракъ болургъа тюшгенди. Аны ючюн,  къарыуу бираз таркъайып, хорлаялмагъанды.

Рингге чыкъгъан тынч иш тюйюлдю, бютюнда сермешге биринчи кере бара эсенг. Гёжеф да бир кесек сагъайгъанын айтады. Алай былайда сёз чып тюшюреме, ачыйма деген къоркъууну юсюнден бармайды. Аллай жерде санга къараргъа келгенлени алларында жууаплылыгъынгы сезесе, аланы жарсытыргъа сюймейсе. Къытдыргъанымда биргеме келгенле кёл этдиргендиле, алай мен а алыкъа кесими кечалмайма, дейди ол ушагъыбызда. 

Спортдан тышында Аслан бизнеси  бла кюрешеди, алай бусагъатда анга биринчи жерде жарауларыды:  «Бу спортха кеч келгенсе (бусагъатда Асланнга 33 жыл болады. – авт.), анга къартса дерикле да болурла. Алай мени жаш адамлагъа айтырыгъым, 20-25 жыл толгъанды, манга спорт бла кюреширге кечди деп мугурайып, тохтап къалыргъа жарамайды. Арымай-талмай, кючюнгю аямай жарау этиу – муратынга жетдирмей къоярыкъ тюйюлдю, ол къыйынынг зырафына кетмез. Фахму, кюрешмесенг, тас болуп кетеди, къыйынынг а - угъай. Мен оюм этгенден, спорт,  адамгъа кюч-къарыу бергенден тышында, чыныкъдыргъан этеди».

Спортну бек биринчи борчу, Алтуу улуну оюумуна кёре, жаш тёлю жетишимли адамлагъа къарап, алача болургъа итинирча этиудю. Ала, заманларын бошуна оздуруп, тютюн ичип, башха аман къылыкълагъа алданып, орамлада керексизине айланмазча. Инсан спортда не излегенин да табарыкъды – тенглени, усталыкъны, файданы да. Алай къатыш единоборстволагъа,  саулукъгъа чып тюшерге къоркъуу бек уллу болгъаны ючюн, 8-9-жыллыкъ сабийни бериу артыкъ иги болмаз, бу жыл санда тутушуу, жюзюу, гимнастика хайырлыдыла.

         Асланны мураты, эришиулеге къатышып, иги сынам жыйып, Малкъарда тренер болуп къалыргъады. «Кеси заманымда тренерим манга, башда айтылгъаныча, аман къылыкъладан сакъланыргъа юйретгенди. Школда юйретмеген затлагъа, сёз ючюн тютюнню, ичгини зараныны юсюнден ол тюшюндюргенди. Мен да, сабийлени юйрете, халкъыма жараргъа сюеме. Хунерли сабийге къараргъа, анга болушлукъ этерге, айнытыргъа керекди.  Тренер болуп, менде жарау этген сабийле тышына кетерге сюйселе, аз да тыярыкъ тюйюлме – барсынла, хорласынла, миллетибизни атын айтдырсынла».