Гюл къысым

Зухураны баш иеси эртте ёлюп, тёрт сабийни анга кесинлей ёсдюрюрге тюшгенди. Болушлукъ этген хазна адам болмагъанды. Къалай-алай болса да, юч жашына бла къызына бийик билимле алдырып, юйюрлюле да этгенди таулу ана. Бюгюнлюкде аланы хар бири да бирер жерде ишлей, баш кечиндиредиле. Ынна да туудукъларына къууана жашайды.

Ана, таулулада тёредеча, гитче жашы бла жашайды. Ахмат аскерчиди. Иши бла байламлы юйюрю бла бир къауум жылны Ростовда туруп, туугъан элине быйыл жыйышханды. Юйдегиси Марьям бла эки сабий ёсдюредиле. Андан къайтханлы келин къайын ана бла жашайды. Аралары да бек игиди.

Ахматдан сора Зухураны бир къызы бла эки жашы барды. Барысы да бир бирге билеклик эте жашайдыла. Ол а таулу ана аланы тюз юйретгенини юсюнден айтады.

…Сегизинчи март Зухураны туугъан кюнюдю. Миллетибизни къадарында ол къара кюн болгъаны себепли, таулу тиширыу бир заманда аны байрамча белгилемегенди. Алай бир кюн алгъа сабийлери аны жюрегин къууандырмай къоймаучудула. Эки абадан жашы тышында болгъанлары себепли, ол къызын сакълай эди. Гюллени неден да бек сюйген тиширыугъа андан уллу саугъа болмаз жер башында. Жашыракъ заманында аны кеси арбазы да аладан толу болуучу эди.

Кюн тюшледе ана, терезеден къарап, Ахматны келип тохтагъанын эследи. Андан жаш машинадан уллу гюл къысымны тюшюрдю. Зухура сабийча къууанды аланы кёрюп. Алай Ахмат гюлле бла, юйню кеслери жашагъан эшиги таба атланды. Ол кезиуде аны жюрегин бир сейир мудахлыкъ къысды… Къысым анга угъай, Марьямгъа эди - 8 мартны байрамына. Бир къауум заманны ана шош, тебалмай турду. Жашы бла келини татлы жашагъанлары аны бек къууандыра эди. Бу жол да ол гюллени аз да къызгъанмады келининден. Алай жашы аны сансыз этип, жангыз бир гюлчюк бла атын тапмагъаны ана жюрегин жер бла тенг этгенди…

Зухура бир кесек эс жыйыгъанда, Ахмат, ашыгъышлы къабакъла таба атланып, машинасына минип артха, ишине тебиреди. Ана къызы келирин ашыгъып сакълай эди. Къарангы бет ала, Асият да келди сабийлери бла анасын алгъышларгъа. Келин да кеси этген тортун да холодильникден чыгъарып, барысы да чай ичдиле. Сора сабийле да, Марьям да болмагъан кезиуде Асият ананы кёлю мудах болгъанын эслеп, не болгъанды, деп сорду. Зухура, сёз да айталмай, жиляп къалды. Ахмат алай этерикди деп сакъламагъан анасын: «Сени гюллеринги энди келтирликди», - деп жапсарыргъа кюрешди. Болсада къарындашы аналарын сансызлап къойгъаны уа аны кесини жюрегин да тарс деп атылтханча этгенди…

Ахмат да ишден кечирек келди. Ол машинасын арбазгъа салгъан кезиуде, Зухура терк-терк терезе къатына жууукълашды. Алай…                                          

Къасымланы Аминат.
Поделиться: