Республикада неандерталецле жашагъанларыны шагъатлыкълары табылгъандыла

ТАСС-дан билдиргенлерине кёре, археологла Къабарты-Малкъарны бийик тау районларындан биринде орта палеолитни кезиуюнден къалгъан -  120-70 минг жыл мындан алгъа - неандерталецле тургъан жерни тапхандыла.

Санкт-Петербургну тарыхла башланнгынчыгъа дери заманланы тинтген лабораториясыны илму ишчиси Екатерина Дороничева билдиргеннге кёре, ол 1,4 километр бийикликде Нальчик сууну башында Акъ-Суудан узакъ болмагъанлай орналыпды. Анга Хумалан дейдиле. Дороничева белгилегенича, неандерталецле быллай бийикликде тургъанлары, ала бу жерлени иги таныгъанларына эм мында аш-суу табалгъанларына шагъатлыкъ этеди.

Былайда тинтиуле 2019 жылны ахырында спелеолог алимлеге Суу-Акъгъан бла Баш Калибрде дорбунлада ташдан этилген урунуу керекле табылгъанланыны юсюнден айтханыдан сора башланнгандыла. Археологлагъа бу билдириу сейир кёрюннгенди, алай пандемияны хатасындан ала бир жылны ичинде ишлерин башлаялмай тургъандыла. Быйыл жаз башында ала да урунуу кереклени кёргендиле. Алимле белгилегенлерича, ала, кертиси бла да, орта палеолитни заманында болгъанлагъа ушайдыла. Ол кезиуде бусагъатдагъы ышанлары болгъан адамла угъай, неандерталецле жашагъандыла. Табылгъан затланы араларында уугъа барырча эм тутулгъан жаныуарны соярча жютю къыйырлары бла керекле бардыла. Баям, ала тау жугъутурлагъа, атлагъа, бугъалагъа бла америкалы доммайлагъа уугъа жюрюгендиле. Алимле былайда неандерталецлени жашауларыны эм турмушларыны юсюнден бютюн кёп информация табарыкъларына ышанадыла. Тинтиуле Россейли илму сообществону грантыны себеплигинде бардырыладыла.

Кульчаланы Зульфия хазырлагъанды.
Поделиться: