Хунерликлерин ачыкъларгъа эм айнытыргъа болуша

Устазны иши къыйын  болгъанлыкъгъа, эсде къалырча такъыйкъалагъа байды. Сабийле, сени кёргенлей, аллынга чабып къучакълагъанлары, санга ышанып, ийнанып къарагъанлары къаллай уллу насыпды. Аллай кезиуледе адам усталыгъын кеси заманында тюз сайлагъанын ангылайды. 

Устазны иши къыйын  болгъанлыкъгъа, эсде къалырча такъыйкъалагъа байды. Сабийле, сени кёргенлей, аллынга чабып къучакълагъанлары, санга ышанып, ийнанып къарагъанлары къаллай уллу насыпды. Аллай кезиуледе адам усталыгъын кеси заманында тюз сайлагъанын ангылайды. 

Жаболаны Аминат Магомедовна Тёбен Чегемни мектебинде технологиядан дерсле береди, «Точка роста» арада да окъутады. Аны  устазлыкъ стажы 33 жылды. «Мени дерслериме асламысында къызчыкъла жюрюйдюле. Ала, тюрлю-тюрлю эришиулеге къатыша, муниципал, республика даражада да алчы жетишимле болдургъандыла. «Модная весна» конкурсда биринчи, экинчи жерлеге чыкъгъандыла», - дейди ол. 

«Точка ростада» Аминат Магомедовна 50 сабийни «Промышленный дизайн» жаны бла юйретеди. Ол да технологиядан къошакъ билим бериуге саналады. Бу аралада дерсле сабийлени хунерлерин ачыкъларгъа эм айнытыргъа болушадыла.

Устаз белгилегенича, бюгюнлюкде жаш адамла артда жашауларында жарарыкъ, хакъы игирек болгъан усталыкъланы сайларгъа сюедиле. Аны ючюн кёплеге бийик, билим алгъанларындан сора, квалификацияларын тюрлендирирге неда жангыртыргъа тюшеди. «Биз ол шартланы эсге алып къурайбыз дерслерибизни, ала ишчи усталыкълагъа эс бурурларына къарайбыз. Аш этиучюле боладыла, дизайн колледжге киредиле», - дейди ол.   

«Точка роста» кабинетледе ачыкъ дерсле, жыл сайын илмуланы ыйыкълары, тюрлю-тюрлю мероприятияла да бардырыладыла. 

Бюгюнлюкде дуния терк тюрленеди, айныйды. Школда сабийлени уллу жашаугъа хазырлагъан устаз да жашаугъа кёре усталыгъын, билимин да дайым ёсдюрюрге, кесини предметине юйретгенден тышында, технологияла, илму къаллай халда болгъанларын билирге тийишлиди. Улбашланы Фатима Владимировна, ол жорукъланы тюзге санай, хар не жаны бла да айныргъа итинеди. 

Ол Къабарты-Малкъар къырал университетни 1998 жылда бошап, андан бери Тёбен Чегемни школунда ишлейди. Химиядан устазды, директорну юйретиу иш жаны бла орунбасарыды, школда «Точка роста» арагъа башчылыкъ этеди.

Ол билдиргенича, «Точка ростада» сабийле шахматла ойнайдыла, 10-11 класслада окъугъан жашчыкъла «Ата журтну къоруулаугъа хазырма» деген кружокга жюрюйдюле. Башланнган классланы окъуучулары программированиягъа юйренедиле, кёп болмай аланы ишлерини презентациясы да къуралгъанды. Квадрокоптерлени жюрютюп, сабийле билимлерин ёсдюргенден тышында, зауукълукъ да аладыла. «Дуния объективде» деген кружокну чегинде окъуучула сурат тюшюрюрге юйренедиле, 3D принтерде сабийле моделирование бла кюрешедиле. 

- Тёбен Чегем республиканы ара шахарындан узакъ болгъаны ючюн, бу точкала сабийлеге технологияла жаны бла айныргъа уллу себепликдиле. Бек башы уа - сабийле анда дерслеге сюйюп, керти да сейир этип жюрюгенлериди. Былтыр выпускнигибиз Акушуланы Ачемез республиканы къауумуну санында, анга уа 11 адам киргендиле, Тамбовха баргъан эди. Анда да уллу ара барды, андан сора Ачемез диплом бла саугъаланнганды, мында юйреннгенин да хайырлана, Москвада усталыкъ билим ала турады. Къумукъланы Тембулат, ахшы окъугъанындан тышында, универсальный сермешледен спортну устасына кандидатды, Мызыланы Кязим ауур атлетикадан спортну устасы болгъанды, - деп билдиреди Фатима Владимировна.

Окъуучуларыны аллай жетишимлери уа саулай школгъа да къууанчды.