«Жаш тёлюбюзню асламысы адет-намысха къаты болгъаны мени къууандырады»

Жазаланы Жулдуз Тёбен Чегемни орта школунда устаз болуп ишлегенли  эки жыйырма бла беш жыл боллукъду.  Ол бийик категориялы устазды. Кёп район эм ведомстволу саугъалагъа тийишли болгъанды.

Къабарты-Малкъар къырал университетни орус тил бла литература эмда малкъар тил бла адабият бёлюмюн  башагъандан сора,Жулдуз, ёз элине  къайтып, мектепде урунуп башлагъанды. Биринчи заманда орус тилден дерсле  берип тургъанды, артда  5-11-чи классланы    малкъар тилден бла адабиятдан окъутуп башлайды.

Жулдуз Исхаковна  ана тилден дерслени азайгъанына жарсыйды. Китапла тюрленип чыкъгъанлыкъгъа, ала план бла ишлерге келишмегенлерин да айтады.  «Бир дерсде тёрт-беш жорукъну билдирирге тюшеди, ол а сабийге бек къыйынды. Окъуучулагъа ансыз да уллу ауурлукъ жетеди. Бир тюрлю затха  хазырланыргъа керек болса, сёз ючюн, ОГЭ-ге бла ЕГЭ-ге, асламысын  ангыламай  къаладыла. Алай, не болсада,  дерслеге хазырланмай келмегенлерине уа бек къууанама»,-дейди ол.    

Устаз, окъуучу ана тилин билирге  итинир ючюн,   кеси план жарашдырады, дерсни оюн халда ётдюрюрге кюрешеди.  Малкъар тилде чыкъгъан журналланы, китапланы эм газетни да хайырланады. «Тамата классланы окъуучулары бек иги окъуйдула. Аладан гитчеле уа осалыракъдыла. Бусагъатда планшетле, телефонла бек  бузадыла сабийлени. Юйюрледе да тауча сёлеширлерине  артыкъ бек къайгъырмайдыла. Ата-ана эс бургъан сабий  не заманда да иги окъуйду»,- дейди Жулдуз Исхаковна.

Устаз сабийле бла бир тилли бола билсе, аны иши къураллыгъына ол толу ийнаныпды.  Ол хар адамгъа да сынау бла келген затды,дейди.
Мектепде тауча назмула, хапарла жазгъан  сабийле болгъанларын  да ёхтемленип айтады Жулдуз Исхаковна. Аланы чыгъармалары «Нюр», «Минги-Тау» журналлада эм «Заман» газетде да басмалана туруучудула.    Жабелланы Зубайда бардырып, театр кружок да ишлейди. Ол да ана тилни сюйдюрюрге, чыгъармачылыкъ ишле бла шагъырей этерге болушады.

– Менден сора да, малкъар тилден Жансуйланы Марина окъутады.  Экибиз да бир бирге билеклик этип ишлейбиз. Не тюрлю жумуш болса да, байламлыкъда тамамлайбыз.   Башха школланы къатында кёрюмдюлерибиз  аман тюйюлдюле. Былтыр  «Ана тилим – жаным-тилим» конкурсда  биринчи жерни алгъанбыз. Буруннгу жыл юч окъуучубуз  республикалы  олимпиадада  хорлагъандыла.  Былтыр да  онунчу классда окъугъан Аппайланы Алина республикалы олимпиадада  экинчи жерге чыкъгъанды,-дейди устаз, къууанып.

Андан сора да, «Ана тилни сакълайыкъ» республикалы  конкурсда онбиринчи классны окъуучусу Жазаланы Ахмат экинчи жер бла саугъаланнганды.   Быйыл да муниципал олимпиадагъа Жулдуз Исхаковна экеуленни хазырлай турады. Кязимни, Къайсынны окъууларына да аны сохталары тири къатышадыла, алчы жерлеге да чыгъадыла.  

– Мен оюм этгенден, устаз окъутуу бла чекленип къалыргъа керек тюйюлдю, адеп-къылыкъгъа да юйретирге борчлуду.  Бусагъатда кёплени ата-аналары эрттенликден ингирге дери ишде боладыла. Сабийлерин юйретирге аланы заманлары бек аз къалады. Биз алагъа себеплик этерге керекбиз, - дейди  сынаулу педагог.

Аны бла бирге ол жаш тёлюню  асламысы  адет-намысха къаты болгъанларын ыразылыкъ бла айтады. «Кёрюп турама аланы абадан адам киргенлей, ёрге къоба, башха намыс да эте билгенлерин. Ол мени къууандырады»,- дейди.   

Жулдуз Исхаковна  ишчи нёгерлерини юсюнден да уллу хурмет бла сагъынады. «Профессионал коллективде ишлейме, барысын да бек сюеме.  Биринден да  жюрегими къыйнарча  сёз эшитмегенме.  Сизни бла тюбешиуюбюзню хайырланып, барысын да Жангы жыл бла алгъышларгъа сюеме. Ол жете турады да, къууанч бла келсин! Барыбызгъа да тынчлыкъ, ырахатлыкъ, къолайлыкъ келтирсин!