Казбек Коков Исламны тилегин толтургъанды

КъМР-ни Башчысы Казбек Коков Прохладныйде жашагъан онбешжыллыкъ Исламны муратын толтургъанды. Алгъаракълада жашчыкъ Къабарты-Малкъарны оноучусуна кесини юйюрюню, анасыны, къарындашларыны юслеринден письмо жазгъанды,  «Муратлагъа жетдирген назы терекде» болуп, гитче къарындашчыкъларыны тилеклерин толтурургъа сюйгенин да билдиргенди. 
 Казбек Коков Ислам бла эм аны анасы бла Правительствону юйюнде назы терекни къатында тюбешгенди. Жашчыкъ бла ушакъ этгенден сора, КъМР-ни Башчысы анга Жангы жылны саугъаларын бергенди. Алай бла Ислам эм аны къарындашчыкълары мобиль гаджетле къоллу болгъандыла. 
Аны бла да къалмай, Казбек Коковну тилеги бла Ислам  назы терекден бир конвертни алгъанды. Анда уа аны тенгли жаш – Рустам – кесини муратын жазгъанды.  «Биз сени бла бирге аны муратын толтурайыкъ. Саугъасын сени атынгдан берирбиз»,- дегенди Казбек Коков. 
Ол Исламгъа бла аны юйюрюне алгъыш этгенди, Жангы жылда насып, жетишимле, кёп къууанчлы кюнле да тежегенди. Исламны анасына уа адепли жаш ёсдюргени ючюн ыспас этгенди.
Бу кюнледе Казбек Коков «Муратлагъа жетдирген назы терекден» алгъан письмолада жазылгъан тилеклени барысын да толтургъанды. Аны саугъаларын къолайсыз, къыйын болумгъа тюшген юйюрлени сабийлери, энчи социал учрежденияда тургъанла да алгъандыла. Къысхасы, къайгъырыу артыкъда бек керек болуп тургъанлагъа энчи эс бурулгъанды. Ол санда Ева бла Алия — планшетле, Егор — сурат ишлерге битеу керекле, Тимур – футбол топ, Руслан бла Имран роботла къоллу болгъандыла. 
«Муратлагъа жетдирген назы терек» деген акцияны Къабарты-Малкъарны Башчысы 15 декабрьде башлагъан эди. Письмолары назы терекге тагъылгъан сабийлени барысы да бу кюнледе саугъаларын аладыла.