«Тау эллеге артыкъда сакъбыз»

Республиканы районларында электрокюч сетьлени жангыртыу жаны бла аслам иш этиледи. Ток ызлагъа иели юйлени эмда производстволу объектлени къошадыла, жамауат аслам жыйылыучу жерлени, орамланы да жарытадыла. Чегем районда да тийишли жумушлагъа тынгылы эс бурулады. Анда не зат этилгенини юсюнден муниципалитетде электрокюч сетьлени башчысы Жаболаны Марат хапарлагъанды бизге:
- Эм биринчиден, бюгюнлюкде районну электрокюч мюлкю къышха толусунлай хазыр болгъанын белгилерге сюеме. Биз ары дери да ремонт эмда жангыртыу жаны бла битеу белгиленнген жумушланы тындыргъанбыз, керек затладан, материалладан да къыстырыкъ этгенбиз. Келир байрам кюнлени, ызы бла башланырыкъ каникулланы кезиуюнде токну хайырланыу иги да кёбейгенин эсге алып, оборудованиягъа, аппаратурагъа, трансформаторлагъа, хар неге да жангыдан жик-жиги бла къарап чыкъгъанбыз, ишеклик туудургъан затларын алышханбыз, бир-бир жерледе жа­нгы автоматика да орнатханбыз.
Ол кюнледе бёлюмню специалистлерини асламысында башхаладача солуу кезиулери болгъанлыкъгъа, тийишли бригадала дежурство бардырлыкъдыла. Къалайда не тюрлю чурум болса да, адамларыбыз мычымай жерине жетерге, ток бла жалчытыуну терк къураргъа хазырдыла.
Арт кезиуледе Чегем районда электрокючню хайырланыу ёсюп баргъаны эсленеди. Жаланда ахыр юч жылны ичинде къадар иели юйлени, производстволаны, объектлени къошханбыз сетьге. Аны бла юч жюзден артыкъ заявканы тамам этгенбиз. Бирлерин бошуна къошуп къоймай, ол тийреледе инфраструктураны, подстанцияланы да жангыртханбыз. Сёз ючюн, быйыл Каменкада, Нартанда, Лячинкъаяда жангы трансформаторла орнатханбыз. Башха элледе да быллай мадар этилгенди дерге боллукъду. 
Келир жылда иш кёпдю. Район терк ёсюп баргъаны себепли электрокючню хайырланыу да, айтханымча, иги къошуп барады. Тенглешдирип белгилесек, башха районланы арасында биз бу жаны бла биринчи жерни алабыз.
Бюгюнлюкде элледе орамланы, жамауат аслам жыйылгъан жерлени кече чыракъла бла жарытыугъа да тийишли эс бурулады. Алгъаракъда Казбек Коков бизни районда болгъанында, тау элледе бу жаны бла мадар этиллигин айтхан эди. Тёбен Чегемде аны проекти хазырды дерге боллукъду. Биз шёндю аны техника энчиликлерин сюзюу эмда тийишдириу бла кюреше турабыз. Мен оюм этгеннге кёре, келир жыл аны тамам этерикбиз. Алай бла Хушто-Сыртдан башлап, чучхурлагъа дери жол жарытыллыкъды.
Булунгуда да орамларында чыракъ жарыкъ боллукъ болур, мен аны тюзюн эшитмегенме, алай элни башчысы тири, къармашыулу адамды да, ол бу жаны бла кёп зат этгенин, анда ишни къолгъа алып, чыракъланы санын кёбейтгенлерин а билеме.
Тёбен Чегемде да ол халда кюрешедиле, тиридиле, ара эмда къыйыр орамлагъа чыракъла орнатадыла. Биз да эллеге бу жаны бла болушургъа кюрешебиз. Кесигиз ангылайсыз, кече ол тийрелеге киргенде орамлары къарангы болсала нечик эриши кёрюннгенин. Чыракъ жарыкъны хайырындан а анда жюрюген сабийлеге, таматалагъа да къоркъуу болмайды.
Яникойну ара орамын жарытыу жаны бла ишни бу айны ахырына бошаргъа таукелдиле. Экинчи Чегемде да алай. Биз алгъаракъда аланы сетьге къошуп, чыракъланы сынам халда юч кюнню ишлетип кёргенбиз.
Яникойда алгъын да болгъандыла чыракъла, алай ала токну аслам кюйдюрген аллайла эдиле. Аны багъасын тёлеген а элге женгил тюйюлдю. Мен алагъа энергияны аягъан чыракълагъа кёчсегиз, кесигизге тап боллукъду деп ангылатханымдан сора, алай этгендиле. Аны бла алгъын 500 ватт кюйдюрген хар чыракъны орунуна, бары да аллай бир къоратмагъан алтышар чыракъ орнатхандыла. Анга кёре токну аяу эмда тийрелени жарытыу борчланы тындыргъандыла.
Айтханымча, районубуз уллуду, ишибиз кёпдю. Шёндюге дери аслам жумуш тамамланнганды, мындан арысында да бош турургъа заман боллукъ тюйюлдю. Бёлюмде уруннганланы хайырындан ол бары да къолубуздан келлигине ишексизме.
Уруннганла дегенде, бизни специалистлерибиз махтаугъа тийишлидиле, тиридиле, къармашыулудула. Барына да ышанама, базынама. Кече окъуна бир жерде авария болгъанын билдирсем, ишге сёз да айтмай чыгъадыла. Энергетикни кюнюнде мен алагъа саулукъ, юйюрлеринде мамырлыкъ тежейме. Ёмюрлери узакъ болсун!

Омарланы Мурат.
Поделиться: