Кёп болмай, Къабарты-Малкъар къырал университетни «Приоритет-2030» стратегиялы программасына кёре, Нальчикни 33-чю номерли школунда «Эрмитаж–класс» клуб ачылгъанды. Аны магъанасы дунияны эм иги музейлеринден бири, Къырал Эрмитажны коллекциясы бла шагъырей болургъа излеген школчуланы бирикдириргеди.
Аны ачылгъан кюнюнде биринчи гуманитар-билим бериу кенгеш да болгъанды. Анга «Эрмитаж-класс» клубну таматасы Альберт Саральп, КъМКъУ-ну илму-излем иш жаны бла проректору Светлана Хаширова, социал-гуманитар институтну таматасы Муслим Тамазов, вузгъа дери хазырлау эм усталыкъ сайларгъа болушуу жаны бла управленияны башчысы Аксана Карашева эм башхала къатышхандыла.
- Бюгюн биз магъаналы жумуш бла жыйылгъанбыз. Республикада биринчи кере «Эрмитаж-класс» клуб ачылады. Къабарты-Малкъар къырал университетни мурдорунда Эрмитажны билим бериу-культура арасы ишлеген биринчи вузду. Сиз, болмагъанча, насыплысыз, клубну биринчи выпускниклери боллукъсуз. Эм башы уа Россейни культура байлыгъы бла шагъырейленирге онг табыллыкъды,- дегенди Светлана Хаширова.
33-чю номерли школну таматасы Казбек Блянихов да айтылгъан сёзлеге къошула, быйыл школ программагъа тюрлениуле кийирилмезликлерин, алай экинчи жылдан башлап профильли классны окъуучуларына къошакъ халда дерсле берилликлерин билдиргенди. Ол алгъадан этилген опросну эсеплерине кёре, энчи классха 8-чи «А» сайланнганын эм келир заманда аланы кабинетлерин тийишли халда жарашдырырча мадар этиллигин да къошханды.
Проектни къурагъанладан бири Альберт Саральп а клубну келечилерине Эрмитажны специалистлери эм КъМКъУ-ну преподавательлери тарыхдан, археологиядан, реставрациядан, искусствоведениядан эм музейни коллекцияларыны юсюнден лекцияла окъурукъларын айтханды.
Школчула КъМКъУ-ну студентлери бла бирге Эрмитаж бардыргъан экспедициялагъа къатышыргъа онг табарыкъдыла. Эм игиле уа Санкт-Петербургга экскурсиягъа чакъырыллыкъдыла.
Энчи классны «Хунерли жаш тёлюню тинтиу эм болушлукъ тапдырыу» подпрограмманы, КъМКъУ-ну «Приоритет-2030» стратегиялы программасыны чеклеринде «Эрмитаж–Кавказ» проектни хайыры бла ачаргъа онг табылгъанды.
Эсге сала айтсакъ, Нальчикни 33-чю школу «Бюгюннгю школ» федерал программаны эм «Билим бериу» миллет проектге кёре ишленнгенди. Мектеп республикада эм уллуладан бириди эм толусунлай тамблагъы кюнню билим бериу учреждениясына келишеди. Ол себепден мында къошакъ билим бериуге да аслам эс бурулады. Алгъаракълада информация технологияладан, робототехникадан эм IT-инжинирингден сабийлени билимлерин ёсдюрюрча IT-клуб ачылгъан эди. Жангы клуб да жетишимли ишлер деп уллу ышаныулукъ барды.
