Назы терекчик - жандауурлукъну белгиси

Казбек Коков «Муратлагъа жетдирген назы терекчик» деген акциягъа къатышханды. Аны башлай, ол аллай жандауурлукъ ишни бардырыуну ниети волонтёрладан чыкъгъанын, Россейни Президенти Владимир Путин а аны дурус кёргенин эсгертгенди. Къабарты-Малкъарны Башчысы  Волонтёрлукъну айнытыуну ресурс арасыны келечилерине бу акцияны къурагъанлары ючюн ыразылыгъын билдиргенди. 

-Къабарты-Малкъарда «Муратлагъа жетдирген назы терекчик» тёреге айланнганды. Огъурлу башламчылыкъларыгъыз эмда инсанлыкъ сезимигиз ючюн сау болугъуз. Сиз не заманда да болушлукъ керек болгъанланы къатларындасыз. Къыйын жашау болумгъа тюшген сабийле байрам кюнледе саугъасыз къалмазлыкъларына ишексизме, - дегенди республиканы оноучусу. 

Казбек Коков назычыкъдан тогъуз къагъыт илляуну алгъанды. Сабийле Жангы жылгъа илляула бла гаджитле, дагъыда спорт бла кюреширча эмда сурат ишлерча керекли конструкторла да тилегендиле. 

Къабарты-Малкъарны Башчысы бла бирге акциягъа КъМР-ни Парламентини Председатели Татьяна Егорова, КъМР-ни Правительствосуну Председатели Мусукланы Алий, РФ-ни Президентини СКФО-да толу эркинликли келечисини аппаратыны баш федерал инспектору Тимур Макоев,  федерал эмда право низамны сакълаучу органларыны башчылары, КъМР-ни Правительствосуну къаууму, муниципал къуралыуланы  таматалары къатышхандыла. 

 

Поделиться: