Халкъларыбызны шуёхлукъларыны тамырлары – тарыхыбызны теренинде

Къабарты-Малкъар къырал университетни  Х.С.Темирканов атлы маданият арасында  «Халкъларыбызны шуёхлукъларыны тамырлары – тарыхыбызны теренинде» деген миллетле аралы  проектни  презентациясы болгъанды. Анга КъМР-ни Башчысыны кенгешчиси Нина Емузова, республиканы жарыкъландырыу, илму эм жаш тёлюню ишлери жаны бла министрини орунбасары Ирина Шантукова, КъМКъУ-ну  проректору  Артур Кажаров, республикада Орус тилни бла литератураны  преподавательлерини ассоциациясыны, «Вече», «Сябры», «Риони» миллет маданият араланы,  «Кюн шахар» сабий академияны келечилери, Нальчик, Бахсан  шахарланы, Элбрус, Чегем, Зольск, Бахсан районланы  мектеплерини окъуучулары, устазлары  да къатышхандыла.

Тюбешиуню  Шимал Кавказда бийик окъуу юйлени студентлерини ассоциациясы бла  Къабарты-Малкъар къырал университетни орус тилни эм битеулю  языкознанияны кафедрасы Президент грантланы фондуну эмда КъМР-ни Жарыкъландырыу, илму эм жаш тёлюню ишлери жаны бла министерствосуну себепликлери бла къурагъандыла.

Жыйылгъанланы алларында сёлеше, проектни автору эмда  программалы башчысы, КъМКъУ-ну профессору,  республикада Орус тилни бла литератураны  преподавательлерини ассоциациясыны башчысы Башийланы  Светлана келгенлеге ыразылыгъын билдиргенди. «Биз бу ишни Азамат Люев бла бирге къолгъа алгъан эдик. Биринчи кюнледен окъуна ол кесини хайырлылыгъын кёргюзтгенди. Аны себепли биз сизни бла апрельден башлап августха дери дайым да ишлерикбиз»,-дегенди.

Андан ары ол проект кесини ишин 2015 жылда башлагъанын, аны программасына 15-ге  жууукъ уллу  иш киргенин  айтханды.  «Бу ишни баш магъанасы жаш тёлюню арасында орус тилни бла литератураны сюйгенле не къадар кёп болурча, башха миллетли жашла бла къызла республикадан  тышына кетмезча, бир бирлери бла  культура байламлыкъла жюрютюрча этиудю, бирикдирилген проектле къурауду»,-деп чертгенди.

Башийланы Светлана проектни чеклерин кенгертир умут болгъанын да айтханды. «Энди анга Шимал-Кавказ федерал округну республикаларын да къошар умутубуз барды»,-дегенди. Мындан ары  планланы юсюнден айта, ол апрельде  устазлагъа  семинар-тренингле къураллыкъларын билдиргенди.  «Проектни экинчи кесегине «Шире круг» деп атагъанбыз. Ол Майский, Прохладна районлада орус тилли миллетлени жаш келечилери бла ишлеуге бурулупду. Анга школчула, студентле, бусагъатда башха жерледе жашагъан, ишлеген, окъугъан майскечиле, прохладначыла да  чакъырыллыкъдыла. Алагъа КъМКъУ-ну башчылары бла тюбешиуле да къураллыкъдыла.

Проектни ючюнчю кесегине кёре уа 6 июньда Пушкинни эсгертмесини къатында  тюбешиу боллукъду. Ары жыл сайын шахардан бла жууукъ элледен 200-ден артыкъ школчу келеди. Быйыл Шимал Кавказны университетини, КъМКъУ-ну студентлери да чакъырыллыкъдыла. Проектни ахыр кесеги уа августда халкъла аралы жай школну къурау бла байламлыды.  Анга уа Россейни, Белоруссияны, Грузияны, Къазахстанны эмда Къабарты-Малкъарны студентлери да къатышырыкъдыла. Аны кезиуюнде  тюрлю-тюрлю тёгерек столла, тарых, лингвистика, медия эм башхала темалагъа  мастер-классла,  экскурсияла, окъуула эмда практикалы ишле боллукъдула»,- дегенди профессор.

Нина Емузова уа семинарлагъа бек ыразы болуп къатышырыгъын айтханды.       «Школ программа бла чекленип къалыуну мен артыкъ дурус кёрмейме, ол чекледен чыгъаргъа керекди, устазлагъа болушургъа тийишлиди. Бу проект ол затха къуллукъ этгени себепли бек аламатды»,-дегенди ол.

Проектни юсюнден кеслерини оюмларын Ирина Шантукова, Артур Кажаров, белоруссланы, эбизелени миллет маданият араларыны атларындан Павел Сидорук, Анзор Лобжанидзе, Шимал Кавказны бийик окъуу юйлерини студентлерини ассоциацияларыны башчысы Азамат Люев, «Китапны сюйгенлени обществосу» жамауат организацияны таматасы Наталья Шинкарева да  билдиргендиле.

«Кюн шахар» сабий академияда «Жилтинчик»  литература кружокга жюрюген  Галим Аришев, Бахсан шахардан Милана Абидова, КъМКъУ-ну филология факультетини 1-чи курсуну студенти  Диана Беканова эмда «Амикс» жыр къауумну солисти Амирхан Амшоков ариу жырланы, назмуланы саугъа этгендиле.

Андан сора проектге къатышханла семинарлагъа кетгендиле.  

Республиканы башха районлары бла тюбешиуле 12 эмда  19 апрельде боллукъдула.