Сёз жолланы тап халгъа келтириуню юсюнден баргъанды

КъМР-ни Башчысы Казбек Коков Москвада Россей Федерацияны Правительствосуну Председателини орунбасары Марат Хуснуллинни башчылыгъында видеоконференцсвязь амал бла бардырылгъан Регионланы айнытыу правительстволу комиссияны президиумуну ишине къатышханды.

Президиумну ишине РФ-ни Правительствосуну Председателини орунбасары Дмитрий Чернышенко,   транспорт министрни биринчи орунбасары  Андрей Костюк,   къурулуш эмда жашау журт-коммунал министрни орунбасары Светлана Иванова, Росавтодорну оноучусу Роман Новиков эм регионланы башчылары къатышхандыла, деп билдиргендиле республиканы оноучусуну пресс-службасыны келечилери. 

Жыйылыуда  жоллада этилген  къурулушла бла байламлы    кёрюмдюле  эм жол къурулушда  ишле не халда болгъаныны юсюнден соруула сюзюлгендиле.

Андан сора да жол-къурулуш комплекс 2022 жылгъа хазырлыгъыны юсюнден планнга къаралгъанды.  Роман Новиков субъектлени жолла бла байламлы юч жыллыкъ программаларын жарашдырыуну юсюнден  айтханды. Марат Хуснуллин докладха тынгылагъандан сора былай дегенди: «Къоркъуусузлу качестволу автомобиль жолла» проектни чеклеринде биз жоллада къурулуш ишлени багъаларын учуз этерге кюрешебиз, ол алай болур ючюн, алгъадан хар затны да хазыр этерге, ол санда, заманында къоратыллыкъ материалланы да учуз багъалары бла сатып алыргъа керекди».    

Вице-премьер субъектлени башчыларына регион магъаналы жоллада   къурулуш ишлени «Журтла эм шахар жашау» миллет проектни чеклеринде окъуу юйлеге, медицина учреждениялагъа, турист объектлеге  баргъан  жолланы тохташдырылгъан мардалагъа, Россейни Правительствосу къабыл этген Транспорт стратегиягъа кёре,  тийишлиликде бардырыргъа кереклисин айтханды.  

Кенгешде этилген билдириуге кёре, Къабарты-Малкъар россейли регионланы арасында жол къурулушда болдургъан кёрюмдюлери  бла алчыланы санындады. Андан сора республика  жоллада къурулуш ишлени бардырыуу бла да аламат кёрюмдюлери барды.

«Къоркъуусузлу качестволу жолла» деген миллет проект бла келир жылда 184 объектде ишле бардырыллыкъдыла,  ол санда  42 жолла баргъан участокда битеу да узунлугъу 123 километр болгъан жерде. Отуз жети  километр жолну жанында чыракъла жанарча боллукъдула, он сегиз объектде  чалдиш темирлени алышырыкъдыла. Андан сора да, адамла жолланы ётген 116 жерде шёндюгюлю излемлеге келишген жангы светофорла орнатыллыкъдыла.

Бюгюнлюкге къурулуш ишле 172 объектде тамамланнгандыла, къалгъанларында бардырыла турадыла. Нальчикде 1.5 километр узунлукъда Шогенцуков атлы проспект жангыртылынады эм Нальчик - Майский автомобиль жолну Кабардинская орамында 4,6 километрге ремонт этиледи. Эки объектни да къурулушу 2022 жылда бошаллыкъды.

Саулай да 2021 жылда жоллада къурулуш ишлени бардырыргъа деп,  эки миллиард сомдан аслам бёлюннген эди. Республика биринчилени санында болуп, этилген келишимлеге кёре  ырысхыланы алып, къурулуш ишлени белгиленнген кезиуледе  башлагъанды. Бюгюнлюкге регионнга «Къоркъуусузлу качестволу жолла» деген миллет проект бла бёлюннген ахчаладан 98 проценти хайырланнганды. Андан сора да «Эл жерлени комплексли айнытыу» деген къырал программагъа кёре, эллени ичинде ремонт этиллик жоллада ишле бошалгъандыла.    

Республикагъа бу ыйыкъда къошакъ халда бёлюннген 100 миллион сомгъа энтта да регион аралы 11 километр жол тап халгъа келтирилликди.

Бизни корр.
Поделиться: