Ахчаны жюрютюуню юсюнден билимигизни сынап кёрюгюз

Озгъан айны ахырындан башлап, бу айны оналтынчысына дери Россейни Банкы, Стратегиялы башламчылыкъланы агентствосу бла бирге финанс окъуулулукъ жаны бла битеуроссей онлайн-зачёт бардырадыла. Анга гражданла бла предпринимательле къатышыргъа боллукъдула.

Бу зачётда ким сюйсе да кесини финанс тематикада билимин сынаргъа, тийишли рекомендацияла алыргъа боллукъду. Ол быллай темаладан къуралады: пенсияла, страхование, депозитле, кредитле, инвестицияла, хыйлачылыкъдан сакъланыу.

Предпринимательлеге деп жарашдырылгъан зачётда уа гитче эмда орта бизнес бла кюрешгенле терк тёлеуле, инвестицияла келтириу, къыралдан болушлукъ бериу амалла бла байламлы темаладан билгенлерин сынап кёрюрге боллукъдула. Аланы дагъыда финанс жумушланы хайырланыу эмда аланы къыйматлылыгъы бла байламлы соруугъа къатышыргъа да чакъырадыла.

Зачёт эки тенгнге бёлюнеди. Биринчиси финансла теманы энди-энди сюзюп башлагъанлагъа деп къуралгъанды. Экинчиси уа аны терен тинтгенлеге. Хар биринде да отузушар соруу барды. Зачётну неллай бир кере сюйсе да ётерге боллукъду. Хар кереге бир сагъат бериледи. Жыйырма эмда андан аслам соруугъа тюз жууап берген инсан энчи сертификат къоллу боллукъду. Дагъыда хар адамгъа рекомендацияла берилликдиле.

Быйыл зачётну къауумлагъа жыйылып ётерге да онг бериледи. Алай этерча беш адамдан къуралгъан къауумну регистрациясын этерге тийишлиди. Алагъа зачёт 14-16 декабрьде ётерикди. Кеслерине да бир сагъат угъай, жаланда 15 минут берилликди.

Онлайн зачёт бла байламлы толу информацияны finzachet2021.ru сайтда алыргъа боллукъду. Регистрацияны да анда этерге керекди.