Кёп сабийли аналагъа – майдалла, махтау эмда ыспас сёзле

КъМР-ни Башчысы Казбек Коков Ананы кюнюню аллында Къабарты-Малкъарны юйюрлерин байрам бла алгъышлагъанды эмда кёп сабийли 18 тиширыуну «Ана махтаулукъну» майдаллары бла саугъалагъанды.

Эпидемиология халны сылтауу бла саугъалау видеоконференция халда бардырылгъанды. Кёп сабийли анала муниципал администрациялагъа чакъырылгъандыла. Аланы белгилеуге  КъМР-ни Парламентини  Председатели Татьяна Егорова, КъМР-ни Правительствосуну Председатели Мусукланы Алий,  КъМР-ни  Парламентини бла Правительствосуну къаууму, муниципалитетлени администрацияларыны башчылары къатышхандыла.

Казбек Коков республикада жашагъан тиширыуланы Ананы кюню бла алгъышлагъанды. «Ана – ма андан магъаналы сёз жокъду хар бир адамгъа да. Андан башланады хар зат да, олду юйюрню тутуругъу, огъурлулукъну, халаллыкъны, къайгъырыулукъну да тауусулмазлыкъ шауданы. Ананы сюймеклиги бизге къарыу-кюч береди, жашауда тюбеген къыйынлыкъланы хорларгъа, игиликге ийнаныргъа болушады. Бу энчи байрам кюн биз кёп сабийли аналагъа бютюн уллу хурмет этгенибизни билдиребиз, ыспас сёзле айтабыз. Уллу эмда шуёх юйюрледе ата-ананы къайгъырыуу, сюймеклиги бютюн бек сезиледи, ниет байлыкъны тёрелери, бир бирге сакъ болуу, хурмет этиу, билеклик этиу, иш кёллюлюк дегенча багъалы ышанла тёлюден-тёлюге ётюп барадыла»,- дегенди Казбек Коков.

Ол бизни  республикада  кёп сабийли юйюрле 13 500-ге жетгенлерин, алада 40, 5 мингден аслам сабий ёсгенин билдиргенди.  Прохладна районну Прогресс элинде жашагъан  Маслова Екатерина Григорьевнаны уа энчи хурметлеп сагъыннганды.  Бу жигит тиширыу 10 аламат сабий ёсдюргенин да белгилеп, аны аллында баш ургъанды. 

КъМР-ни Башчысы юйюрлеге, бек алгъа уа кёп сабийли юйюрлеге, болушуу къырал политиканы баш магъаналы борчу болгъанын чертгенди. «Ол Россейни жангыртылгъан Конституциясында бегейтилипди. Миллет проектледе бла программалада толтурулады. Къабарты-Малкъарда да юйюрлеге бла сабийлеге болушуу жаны бла мадарла этиледиле. Алай биз аны бла тохтап къаллыкъ тюйюлбюз, алагъа тутхучлулукъ этиу бютюн къыйматлы болур ючюн къолдан келгенни аярыкъ тюйюлбюз», - дегенди регионну оноучусу.

 Андан сора «Ана махтаулукъну» майдаллары кёп сабийли аналагъа муниципал къуралыуланы администрацияларында берилгендиле.  Ахырында Казбек Коков аналаны энтта да бир кере алгъышлагъанды. «Сабийлеригиз насыплы болсунла, жетишимлери бла къууандырсынла, къыралыбызда атлары жаланда иги бла айтылсын!»,- дегенди.