Биригип ишлеуню ахшы эсеплери сюзюлгендиле

КъМР-ни Башчысы Казбек Коков Къабарты-Малкъардан Россей Федерацияны сенаторлары Арсен Каноков эм Улбашланы Мухарбий, Къырал Думада «Единая Россиядан» депутатла Геккиланы Заур, Виктория Родина эм Адальби Шхагошев бла тюбешгенди. Жолугъуу РФ-ни Президентинде КъМР-ни Болжалсыз представительствосуну Москвада мекямында ётгенди.

Анда Къырал Думада къабыл кёрюлген 2022 жылгъа эм 2023-2024 план кезиуге Федерал бюджетни юсюнден законну хазырлауда биригип ишлеуню эсеплери сюзюлгендиле. Документни экинчи окъуугъа хазырлагъанда 1000 чакълы бир эсгертиу келгенди, аладан 573-сю дурус кёрюлгендиле. Аланы асламысын – бек магъаналыларын эм жашауда изленнгенлерин – «Единая Россия» партияны депутат фракциясы кийиргени белгиленнгенди.

Къабыл кёрюлген эсгертиулеге кёре регионлагъа улоула жюрюген регион эм жер-жерли магъаналы жолланы ремонтуна, эл тийрелени айнытыугъа, элде медицина болушлукъ тапдырыуну женгиллендириуге, сакъатланы жашау журтла бла жалчытыугъа, студент общежитлени ремонтларына, спорт майданланы ишлеуге, жаш адамланы иш бла жалчытыугъа, социал къоранчланы индексация этиуге эм башхалагъа къошакъ халда ырысхы бёлюнюрюкдю.

- «Единая Россия» къыралда алчы политика кюч болгъанды эм аллайлай къаллыкъды, ол, уллу борчла салгъанындан сора да, халкъны сейирлерин къоруулауда кесини оюмун сакълай, айырыучуланы аллында борчларын толтура биледи,- дегенди КъМР-ни Башчысы.

Казбек Коков былай айтханды: «Неден башлагъаныбызны, 2019 жылдан бери республикагъа къаллай финанс ызланы планнга салгъаныбызны белгилерге сюеме: 2024 жылгъа 60 миллиард сом. Алай белгиленнген тарихге КъМР-ни бюджетини бирлешдирилген файдалары эки жылгъа алгъа жетерикдиле – 2022 жылда. Бюджетни юсюнден къабыл кёрюлген Законда бизни излемлерибиз не жаны бла да эсге алыннгандыла. Эм алгъа Россейни Президенти Владимир Владимирович Путиннге, РФ-ни Правительствосуну Председатели Михаил Владимирович Мишустиннге, Россейни Президентини СКФО-да толу эркинликли келечиси Юрий Яковлевич Чайкагъа, Правительствону Председателини орунбасарларына, федерал министерстволаны бла ведомстволаны таматаларына, Къырал Думаны комитетлерине эм «Единая Россия» партияны къуллукъчуларына ыразылыгъымы билдиреме».

Республиканы Башчысы законну къабыл кёрюу жумушда Къырал Думаны комитетлеринде тири ишлеген Къабарты-Малкъарны келечилерини къатышыуларын белгилегенди.

Экинчи окъуулагъа бюджет проектге эсгертиуле кийирилгендиле, алагъа кёре Къабарты-Малкъаргъа къошакъ халда 6,1 миллиард сом бёлюнюрюкдю. Аладан 2,1 миллиард сому жангы школ жерлени къураугъа жиберилликди. Дагъыда къошакъ ырысхы онкология араны, Биринчи нальчик поликлиниканы жангы мекямыны, Жаш тёлю чыгъармачылыкъны дворецини (Театрланы двореци) къурулушларына, канализация ызланы жангыртыугъа эм тазалау сооруженияланы ишлеуге, Нальчикде жашау журтла орналгъан тийреледе инженер инфраструктураны къураугъа къоратыллыкъды.

430 миллион сом эм 230 миллион сом ёлчемде къошакъ ырысхы «Эл жолла» бла «Къоркъуусуз эм качестволу жолла» деген программалагъа тийишлисича бёлюнюрюкдю. Регион бюджетни тийишли халгъа келтириуге 15,4 миллиард сом белгиленеди, 798 миллион сом – бюджет бёлюмню ишчилерини хакъларын кётюрюу бла байламлы къошакъ къоранчланы компенсацияларына.

- Бу барысы да ёз Къабарты-Малкъарны, республиканы жамауатыны игилигине деп этиледи.  Тюзюнлей айтайым, депутатларыбызны быллай жетишимли ишлеулери бир заманда да болмагъанды. Тюбешиуге къатышханлагъа ишлери, республиканы айырыучуларыны ышаныуларын алдамагъанлары ючюн битеу жюрегимден ыразылыгъымы билдиреме,- деп чертгенди Казбек Коков.