Энчи юйретиуле, лекцияла, кёрмючле

Тёзюмлюкню Халкъла аралы кюнюне атап ФСИН-ни Къабарты-Малкъарда Управлениясы тёртюнчю номерли колонияда бир-бирге хурмет этиуню эмда ариу сёлеше билиуню акциясын къурагъанды. Учрежденияны психологлары бир айны ичинде тийишли викторинала эмда лекцияла бардыргъандыла. Бу ишни чеклеринде, колонияда кечиннгенлеге деп агитация жумушланы тамамлагъандыла, тематикалы китап кёрмюч эмда литература тюбешиу да къурагъандыла.

Тиширыуланы араларында уа бир-бирлерин ангылап жашаргъа юйретген оюн бардырылгъанды. Ведомствода айтханларына кёре, быллай оюнла аланы араларында шуёхлукъ сезимлени кючлендиредиле, инсанланы чыгъармачылыкъ хунерликлерин айнытадыла.

Учрежденияны келечилери быллай жумушла колонияда олтургъанланы тюз жашау этерге юйретгенлерин, артда эркинликге чыкъгъанда, халкъ арасында тийишли жер табаргъа себепликлерин белгилеп айтхандыла.