Эки жанлы тюбешиу болгъанды

Александр Новакны Къабарты-Малкъар Республикагъа ишчи жумуш бла келгенини  юсюнден КъМР-ни Башчысы Казбек Коков  Россейни вице-премьери  бла эки жанлы тюбешиу  бардыргъанды, деп билдиредиле редакциягъа республиканы оноучусуну пресс-службасыны келечилери.

Тюбешиуде республиканы суу бла жалчытыу, быргъыланы салыу эм Нальчик шахарда кир суула жыйылыучу жерни къурулушун бардырыр ючюн, аланы «Шимал-Кавказ федерал округну айнытыу»  федерал программагъа  къошар  онгла   сюзюлгендиле. Андан сора да, тюбешиуде уллу магъана  республикагъа инвесторла  эслерин бурурча этиуге, миллет проектлени эм социал борчланы толтуруу соруулагъа да къаралгъанды. 

 Шимал-Кавказ федерал округгъа кирген регионланы качестволу суу бла жалчытыуну къайгъыларын тамамлау баш борчладан бириди,- деп чертгенди Александр Новак.

Тюбешиуде   къаралгъан магъаналы сорууладан бири газ ызланы тартыу бла байламлы болгъанды.  Александр Новак белгилегеннге кёре, Россейни Президенти салгъан борчладан бири, 2022 жылны ахырына  дери жер-жерледе адамланы юйлерин газ бла жалчытыу ишлени бошаргъа керекди.

«Газпром» акционер обществону планларына кёре 2025 жылны ахырына компания регионда табийгъат газны тартыу бла байламлы техника ишлени бошаргъа умут этеди. Андан сора да тогъуз газ юлешиучю станция  жангыртыллыкъды, техника жаны бла  хар заты да алышындырыллыкъды эм газ баргъан быргъыланы бир-бирге къошхан жер да ишленирикди.

Бюгюнлюкде регионну табийгъат газ бла жалчытыу 96, 8 процентге жетгенди, ол кёрюмдю Россейде эм игиледен бирине саналады.  

Республиканы турист онгларыны юсюнден айта, Александр Новак былай дегенди: «Тау лыжалада учуучу арала къыралда уллу сурам барды, ол бёлюм терк айнып барады. Кёп затгъа жангыдан къарап, алышындырыргъа эм жангыртыргъа тюшерикди. Конкуренция уллу болгъан кезиуде жангыдан ишлеген тынчды, аны жангыртхандан эсе. Ол ишлеге деп 2024 жылгъа дери бюджетден 15  миллиард сом бёлюрге мурат барды.

Къонакъ юйлени, адамланы ашатырча эм солурча жерлени  ишлерге онгла къураргъа керекди. Ол сорууланы комплексли тамамлау айныугъа себеплик этерикди».

Казбек Коков Александр Новакгъа Къабарты-Малкъарны социал-экономика айныуу бла байламлы соруулагъа эс бургъаны ючюн ыразылыгъын билдиргенди. Республикада экономика бла байламлы проектлени хайырланыугъа себеплик этиу – адамланы жашауларыны качестволарын кётюрлюкдю, деп айтылады билдириуде.

Бизни корр.