МФЦ бюгюнлюкге 4,5 миллион жумуш тамамлагъанды

Алгъаракълада КъМР-ни Парламентини президиумуну кенгешинде бардырылгъан «правительстволу сагъатны» чеклеринде башха вопросланы санында республикада къырал эмда муниципал жумушланы бериуню юсюнден да сёлешгендиле. Жыйылыугъа экономиканы айнытыу министр Рахайланы Борис эмда МФЦ-ны башчысы Аслан Афаунов да къатышхан эдиле.

Рахайланы Борис быллай жумушла бериу иш къалай къуралгъаныны, аланы электрон халгъа кёчюрюуню, ведомстволаны араларында байламлыкъланы да алай тамамлауну юсюнден хапарлагъанды. Министр айтханыча, гражданла МФЦ-да мингден артыкъ тюрлю жумушну тамамларгъа боллукъдула. Ол санда экиден бирин – электрон халда.

Бюгюнлюкде республика «Мультирегиональность ЕПГУ» деген федерал проектге къошулупду. Ол саулай къыралда электрон жумушланы «бир терезе» деген амал бла бериуню качествосун игилендириу бла байламлыды. Алгъын кезиуледе хар регионда заявленияны формасы, керек документлени тизмеси да башха-башха болуучу эселе, энди, бу проектни хайырындан, ала бары да битеу къыралда бирчадыла.

Къабарты-Малкъарда МФЦ-ны онеки бёлюмю ишлейди. Алада хайырланыучуланы жумушларына къарагъан 245 жер барды. Энтта да 149 жер 116 элде къуралгъанды. Бизнес бла кюрешгенлеге «МФЦ для бизнеса» деген офис ачылгъанды. Анда Россельхозбанк бла «Нальчик» банк берген жумушланы тындырыргъа амал бериледи.

Республикада жашагъан хар ким да «Мени документлерим» деген аралагъа барып, 350 къырал эмда муниципал жумушну тамамларгъа боллукъду. Дагъыда МФЦ-да бир заявление берип, тюрлю-тюрлю жашау болумла (сабий туугъан, къурулуш, юй сатып алыу, бизнес къурау…) бла байламлы бир ненча жумушну комплекс халда этерге амал барды.

Саулай алып айтханда, биринчи офис ачылгъан кюнден башлап, быйыл биринчи октябрьге дери МФЦ 4,5 миллион жумуш тамамлагъанды эмда жети миллион заявлениягъа къарагъанды. РФ-ни Экономиканы айнытыу министерствосуну тергеулерине кёре Къабарты-Малкъарда учрежденияны иши бла ыразы болгъанланы саны 98,71 процент болгъанды.

Улбашланы Мурат хазырлагъанды.
Поделиться: