Кир-кипчикни ташыу ючюн артыкъ тёлемезча

Кир-кипчикни ташыу бла кюрешген «Экологистика» организациягъа «борч къайдан чыкъгъанды, юйде жашагъанланы саны счётда кёргюзтюлгеннге нек келишмейди» деп кёпле сёлешедиле. Анда айтханларына кёре, быллай ангылашыныусузла чыкъмаз ючюн, юйде ненча инсан жашагъаныны юсюнден абонентлени жумушларына къарагъан бёлюмге сёлешип билдирирге керекди. Ол РФ-ни Правительствосуну 2011 жылда 6 майдан 354-чю номерли бегими бла тохташдырылгъанды.

Алай этилмесе, «Экологистика» информацияны башха жерледен мажарады. Сёз ючюн, ГИС ЖКХ федерал системадан, къырал власть органладан. Бирде аны специалистлери юй сайын айланып сорургъа да боллукъдула. Бек игиси уа - фатарны иеси тийишли документлени кёргюзтсе. Алай этилсе, артда адамла, организация кеси да керексиз дауладан къутулургъа боллукъдула.

Юйню иеси, счётда кёргюзтюлгенлени санын тюзге санамаса, анда ненчауланны регистрациясы болгъанына шагъатлыкъ этген къагъытланы алып, абонент бёлюмге барыргъа керекди. Специалистле, алагъа къарап, лицевой счётда тарихлени тюрлендирликдиле. Керек болса, тёлеулени да жангыдан тергерикдиле.

«Экологистика» бла келишим этерча ары тийишли документлени (паспорт, юйге иеликни регистрациясыны юсюнден свидетельство, юйню китабы неда МФЦ-дан анда ненча бир адам жашагъанын кёргюзтген декларация) элтирге керекди. Организацияны адреси: Нальчик, Байсолтан улу атлы орам, 10. Районлада бёлюмле орналгъан жерлени ecologistika.com сайтда табарыкъсыз. Соруулары болгъанла 8(8662) 22-91-10 телефон номерге сёлешсинле. Документлени организацияны abon@ecologistika.com электрон почтасына жиберирге боллукъду.