Соруугъа къатышыргъа чакъырадыла

Россей Федерацияны Ара банкы финанс учрежденияланы эмда страховой компанияланы клиентлерини – гражданланы, предприятияланы бла организацияланы – араларында сагъынылгъан финанс организацияла тапдыргъан жумушланы къоркъуусузлукъларыны юсюнден соруу бардырып, анга къатышыргъа чакъырады. Ол Ара банкны интернет сайтында келир айны ючюнчюсюне дери ётерикди.

Соруугъа къатышханла, банкла неда страховой компанияла кеслеринде хыйлачылыкъ жаны бла къоркъуу болгъаныны юсюнден алагъа абери билдире эселе, айтыргъа керекдиле. Аллай тапсыз шартла чыкъсала, финанс организацияла не мадар этгенлерини, дагъыда аланы сервислери къалай ишлегенлерини юсюнден билдиредиле.

Бу информацияны тийишдиргенден сора Ара банк киберкъоркъуусузлукъ бёлюмде финанс учрежденияла бла ишин андан да къыйматлы этерге умутлуду. Сорууну кезиуюнде жыйылгъан информация жарыкъландырыу ишни бардыргъанда да хайырланыллыкъды.

Улбашланы Мурат хазырлагъанды.
Поделиться: