Келир жыл Тёбен Чегемде бла Хушто-Сыртда жолла тапландырыллыкъдыла

Тюнене КъМР-ни Башчысы Казбек Коков ишчи жумуш бла Чегем районнга баргъанды.

Республиканы оноучусу элледе болгъан кезиуде Тёбен Чегемге бла Хушто- Сыртда жашагъанла бла тюбешгенди, ала анга жолланы халларына эс бурургъа кереклисин айтхандыла. Алгъаракъда Къабарты-Малкъарны Башчысы ол жаны бла соруулагъа къараргъа буюургъан эди. КъМР-ни транспорт эм жол мюлк министри Аслан Дышеков  бюгюнлюкге проект-смета къагъытлары хазыр болгъанын билдиргенди.

Планнга кёре, келир жылны апрель айындан тебиреп, Экинчи Чегем-Булунгу автомобиль жолну Тёбен-Чегем бла Хушто-Сыртны чеклеринден тергеп, жангыртыу ишле бардырыллыкъдыла. Битеу да жети километрден аслам жолгъа   ремонт этилликди, ол санда тратуарла ишленирикдиле, чыракъла да жанарча боллукъду.

 Андан сора ол жерли адамланы тилеклерине кёре, 2022 жылда Хушто-Сыртны бла Чегем чучхурланы ортасында жолда чыракъла жанарча этилликди. Чегем чучхурладан Булунгугъа дери баргъан жол   2022 жылда зыгъыр къуюуп, тынгылы тапландырыллыкъды, андан сора ол участокну асфальт эм бетон бла жабарча соруугъа къараллыкъды.

 Тюбешиуню кезиуюнде башха соруула да сюзюлгендиле. Тёбен Чегемни орта школуну директору Сарбашланы Ахмат билдиргеннге кёре, элни мектеби тынгылы ремонт этилирге керекли  федерал программа  тюшгенди. Дагъыда ол билим берген учрежденияны жеринде окъуучулагъа спорт бла кюреширча онг  къуралса, иги боллукъ эди деп билдиргенди. Сарбаш улуну тилегине, КъМР-ни Башчысы ол объект 2022 жылда биринчи сентябрьге дери ишленирикди деп жууаплагъанды.

 Андан сора да ол элде физкультура эм саулукъ  кючлеу  комплекс ишлерге кереклисини юсюнден   соруугъа да къарала турады.

Хушто-Сыртда жашагъанла жамауат автотранспортну жюрюуюне эс бурургъа  кереклисин айтхандыла. Казбек Коков ангылатханына кёре, жууукъ заманда   маршрутлагъа адамла аслам сыйыннган автобусла салынныкъдыла эм аланы жюрюулерини аралырына да къараллыкъды.

 Казбек Коков  Чегем районнга ишчи жумуш бла барып келгенини юсю бла тийишли буюурула бергенди, деп билдиргендиле   республиканы оноучусуну пресс-службасыны келечилери.

Бизни корр.