Хорлагъанла Москвагъа барлыкъдыла

КъМКъУ бла Шимал-Кавказ къырал университет  информатикадан  «45 параллель» деген ат бла  конкурс къурагъандыла. Анга  Шимал-Кавказ регионну окъуу юйлерини биринчи курсларыны студентлери  эм школларыны абадан классларыны окъуучулары къатышхандыла – битеу да   жюзден артыкъ адам. Экинчи тургъа жаланда  жетеулен ёталгъанды. Ала  жюз балл алгъанла эдиле. Бек алаша балл а  78  эди. Конкурс  кеси да КъМКъУ-да бардырылгъанды.

-Экинчи тургъа ётгенлени асламысы   Нальчикде «Кюн шахар»  сабий академиядан болгъанлары да  къууандырады. Биз аланы жетишимлери бла ёхтемленебиз эмда ала  билимлерин андан ары ёсдюрюр ючюн Къабарты-Малкъар къырал университетге келселе бек ыразы боллукъбуз,-дегенди техника илмуланы кандидаты, КъМКъУ-ну преподаватели Владимир Лысенко.

Конкурсну экинчи турун бардырыугъа  дагъыда окъуу юйде ишлеген преподавательле Аслан Нагуров бла Залим Бесланеев болушадыла. Мында айырмалы болгъанла Битеуроссей конкурсха къатышырыкъдыла.