Электрокюч бла жалчытыу ышаннгылыды

«Россети Шимал Кавказ» компания СКФО-ну энергетика комплексин келир къышха тынгылы хазырлагъанды. Анга шагъат этген паспортну РФ-ни Энергетика министерствосу бу кюнледе бергенди. Къабарты-Малкъарда бу жаны бла не мадар этилгенини юсюнден а бу кюнледе «Каббалкэнерго» предприятияда бардырылгъан пресс-конференцияда аны баш инженери Алибек Яганов билдиргенди.
Саулай айтханда, быйылгъы ремонт эмда жангыртыу программасын предприятие артыгъы бла окъуна толтургъанды, тийишли ишлеге кёп къалмай 190 миллион сом къоратылгъанды. Специалистле ток ызлада 3,5 мингден артыкъ тозурагъан жерлерин жангыртхандыла, 304 эски чыпынны алышхандыла, тёрт трансформаторгъа, 151 трансформатор подстанциягъа, эмда 192 коммутация аппаратха ремонт этгендиле. Андан сора да, эски ток ызланы тёрт жюз километрге жууукъ кесегин жангыртхандыла.

Мекямлагъа, энергетика объектлеге, диспетчер пунктлагъа, автоматика эмда къоруулаучу устройстволагъа, предприятияны автотранспортуна да тынгылы къаралгъанды. Аварияла болсала, жерине барып мадар этерча 23 бригада къуралгъанды, дегенди Алибек Яганов. Алада битеу керекли техника эмда оборудование барды. Ишчиле къоруулаучу затла, инструментле, энчи юс кийимле бла жалчытылыннгандыла. Оборудованиядан бла материалладан да къыстырыкъ этилгенди.

Къыйын кезиуледе энергетикле башха ведомствола бла байламлыкъда къармашадыла. Ол умутда МЧС-ни республикада баш Управлениясы бла юйретиуле бардырылгъандыла. Ремонт баргъан кезиуде хайырланыучуланы электрокюч бла жалчытырча онбир генератор хазыр этилгенди. Ала бары да 145,9 киловатт бередиле.

Алибек Яганов айтханыча, тау тийреледе туристле аслам барыучу жерледе электрокюч бла жалчытыуда чурум болмазына предприятие бек тынгылы къарагъанды. Элбрус районда 42,7 километр ызлагъа, онтёрт трансформатор подстанциягъа, онюч трансформаторгъа ремонт этилгенди, бийик вольтлу трассаланы тийрелери (28 гектар) тазаланнганды.

«Каббалкэнергону» баш инженери электрокючню къоранчларын азайтыу жаны бла предприятие не зат этгенин да билдиргенди. «Анга биз бек уллу эс бурабыз. Бу ишни чеклеринде эски ток ызланы кетерип, жангыларын, андан да кючлюлерин созабыз. Дагъыда электрокючню эсеплеген «акъыллы приборла» орнатабыз. Тийишли программаны чеклеринде Бахсан эмда Лескен районлада, сора дагъыда Бахсан шахар округда быйыл 40 минг аллай прибор орнатханбыз. Ала кёргюзтюулени бизге сеть бла жибергенлей турадыла, жеринде неллай бир ток кюйдюрюлгенин да жик-жиги бла кёргюзтедиле», - дегенди Яганов.
Этилген ишни хайыры баямды: быллай счётчикле орнатылгъаны бла ол тийреледе къоранчла сегиз процентге азайгъандыла. Предприятияны специалистлери контроль ишни андан ары бардырадыла. Былтыр, сёз ючюн, сетьлеге эркинликсиз къошулгъан 380 шарт ачыкълап, 14 миллион киловатт-сагъат ток урланнганын тохташдыргъандыла. Дагъыда пластик бла тышланнган чыбыкъла себеплик этедиле токну урлауну тыяргъа. Быйыл аладан 490 километрин созгъандыла.

Алгъын жылла бла тенглешдиргенде, быллай къоранчла аз-аздан кёбейе баргъанларын белгилегенди баш инженер. Аны сылтауун асламысында электрокюч сетьле тозурагъанларында кёргенди ол. Бюгюнлюкге саулай къыралда быллай мюлкню 70 проценти эски болгъанды, бизни республикада да ол кёрюмдю андан артыкъ башха тюйюлдю, деп къошханды кеси да.
Ахырында Алибек Яганов хайырланыучуланы электрокюч бла ышаннгылы жалчытырча «Каббалкэнергону» специалистлери келир къыш кезиуде къолдан келгенни аямай къармашырыкъларын чертгенди.