"Заманнга" жазылыргъа созмайыкъ

Газетге жазылыуну юсюнден тохтамай айтып туруу сизге – газет окъуучулагъа, къалай кёрюннгенин билмейме, алай редакцияда ишлегенлеге уа ол артыкъ хычыуун  тюйюлдю. Тюзю, мени кесиме бек ауур кёрюнеди – элден элге барып, анда жамауат бла тюбешип, ы-ы, маржа, «Заман» газетге жазылыгъыз деп айланмакълыкъ. Былайда сиз мени тюз ангылагъыз, биз халкъыбызгъа къуллукъ, жумуш этгенибизге эринмейбиз неда ийлыкъмайбыз. Аны айтханым, ана тилибизде чыкъгъан жангыз къырал газетге жазылыу ишни къурагъан адам миллет ючюн кюрешеди, бек алгъа уа – аны культурасы, тили, адети, тёреси, къысха айтханда, тамбласы ючюн къайгъырады деп, алай ангылайма аны магъанасын.

Болсада кёчгюнчюлюкден къайтханлы да – 1957 жылдан берисинде, редакцияда ишлегенле газетге жазылыгъыз, дегенни айтып, тилекчи болгъанлай жашаргъа керекми эди?! Аны юсюнден сагъыш эте келсем, мени  жашауумда болгъан бир сейир иш эсиме, тюшеди. Бир тёртюнчю-бешинчи класслада окъуй болур эдим,, айталлыкъ тюйюлме тюзетип. Сехле артындан почтачы сёлешеди. Къарт анам аны ауазын эшитгени бла, къолунда  урчукъчугъун бир жанына салып, алботасын да къагъа, эшикге чыгъады. Ол аны келирин кюн сайын ашыгъып сакълаучу эди. Артда кеч билеме аны сылтауун. Амманы тёрт къарындашындан ючюсю  урушда тас  болгъандыла. Ол а аладан хапар сакълай эди. Артха, юйге кирип, къолунда газетни аттягъа (къарт атабызгъа алай айтыучу эдик) узатады. Ол аны, башха заманладача, ары-бери бура турмагъанлай, кесича окъуп тебирейди. Амма аны окъугъанына сейир этип: «Алан, газетни баштёбен тутуп къалай окъуйса?» - дейди. «Алаймыды!» - деп мыйыкъ тюбюнден ышарады. Окъуй-жаза билмеген къарт андан бир уллу зауукълукъ табаргъа угъай, аны саны кёп болсун деп жаздыргъанды газетни. 

Бюгюнлюкде барыбыз да билимлиле, окъуулула. Алай нек эсе да, жылдан-жылгъа газетге жазылыу къыйындан-къыйын бола, саны да тюше барады. Келигиз, аны юсюнден барыбыз да сагъыш этейик. Огъурлугъа, этимлиге, билимлиге да саналгъан, къыйынлыкъны да хорлай билген халкъыбыз а быллай миллет магъананы тутхан ишни юсюнде уллу кёллю болмаз деп бек ышанама.

Кертиди, халкъны санына кёре тергегенде, «Заманнга» жазылыу бирси изданияладан онглу болады. Бу ишде бизге иги болушханлагъа ыспас сёзюбюзню айтханлай турабыз. Аны себепли ол затланы жангыдан санай турмайым. Газетге жазылыуну заманы аздан-аз къала барады. Ол себепден келигиз, «Заманнга» жазылыргъа унутмайыкъ.

Эндиге дери бола келгенинден хыйсап этсек, газетге жазылыу ишни ахыр кюнлеге дери созуучубуз. Бу жол ол тёрени унутайыкъ да, «Заман»  газетни келе тургъан жылны биринчи жарымында хар таулу юйюр алырча этейик. Ол да миллет ёхтемликни бир шартыды.

Мухаммат улу Б.
Поделиться: