Жандауурлукъну жарыгъы

Бу айны жыйырманчысындан башлап, тёртюнчю декабрьге дери саулай къыралда #ЩедрыйВторник информациялы акция бардырыллыкъды. Аны филантропияны айнытхан эмда анга себеплик этген «КАФ» фонд къурагъанды, жандауурлукъну быйыл 30 ноябрьде белгиленирик битеудуния кюнюне жоралап.

Акцияны бардырыуну баш магъанасы, Россей Федерацияда жандауурлукъ, волонтёрлукъ эмда билеклик этиу культураны айнытыу бла байламлыды. Бу башламчылыкъны хайырындан коммерциялы болмагъан тюрлю-тюрлю социал организациялагъа, бизнесге, асламлы информация средстволагъа эмда жер-жерледе жамауатлагъа бирге къыйматлы ишлерча онгла къураллыкъдыла.

«КАФ» кеси да коммерциялы болмагъан организацияды. Ол жандауурлукъ программала бла кюрешеди, грант конкурсла эмда тинтиуле бардырады, проектле жарашдыргъанлагъа консультацияла береди. #ЩедрыйВторник акция уа Президент грантланы фондуну болушлугъу бла бардырылады.

Бу ахшы башламчылыкъны юсюнден оюмун КъМР-ни промышленность, энергетика эм сатыу-алыу министри Шамиль Ахубеков да айтханды: «Хар инсанны да ич дуниясында жандауурлукъ тийишли жерни алады. Бизни республикада адамла, организацияла эмда бизнес бу бёлюмде не этгенлерин кёреме. Ала саулукъларында чекленнген онглары болгъанлагъа бирлешип болушадыла, къолайсыз юйюрлеге, саусуз сабийлеге билеклик тапдырадыла. Быллай юлгюлени саны кёпдю. Адамны къадарына, къыралны тамблагъы кюнюне уллу кёллю болмагъан жерлешлерибизге мен ыспас этерге сюеме».

2016 жылдан бери бу акциягъа къыралны битеу регионларындан тёрт мингден артыкъ организация къошулгъанды. Калининграддан башлап, Камчаткагъа дери бардырылгъан жандауурлукъ жумушланы саны мингле бла тергеледи. Статистика шартлагъа кёре аланы кезиуюнде тийишли организациялагъа эки кереге кёп болушлукъ этиледи.

#ЩедрыйВторник акциягъа хар сюйген да къатышыргъа эркинди: башхасы жокъду энчи бир адам болсун неда организация. Аны чеклеринде компанияла кеслерини социал жаны бла ишлерини юсюнден жамауатха билдирирге боллукъдула. Коммерциялы болмагъан организацияла да донорланы, волонтёрланы, болушлукъ берирге къолларындан келгенлени чакъырадыла.