Аскер борчларына берилгенле

Чочайланы  Дауутну жашы Зауур бийик тау эл Бызынгыда туугъанды. Ол элде мектепни тогъуз классын тауусхандан сора  Къабарты-Малкъар къырал университетни  медицина колледжине окъургъа киреди. Экинчи курсну бошап,  С.М.Киров атлы аскер-медицина академиягъа окъургъа барады. Бийик окъуу юйню бек иги белгилеге бошап чыгъады. Бусагъатда Чочайланы жаш гвардии прапорщик чында  Москва тийреде хауа-десант аскерлени бригадасыны медицина отрядында къуллукъ этеди.

Аскер-медицина академияда  билим алгъан заманында  бызынгылы жаш, ахшы кёрюмдюле болдуруп, тенглерине  окъууда, спортда эмда илму жаны бла да юлгю болуп тургъанды. «Очаг-2016» юйрениулени  кезиуюнде ахшы ишлегени эмда бийик кёрюмдюлери ючюн  Зауур академияны  начальниги  генерал-майор А.Бельских къол салгъан грамотагъа тийишли болгъанды. Дагъыда ол жыл «Жаш  профессионалла» (Вордскиллс Россия)-2016» чемпионатда «Медицина эмда социал жумуш этиу» бёлюмде хорлам болдуруп, «(Вордскиллс Россия) профессионал айныуну агентствосу»  коммерциялды болмагъан автоном организацияны таматасы Р.Уразов къол салгъан дипломну алгъанды. Таулу жаш  академияны кафедрасы  медицина жаны бла бардыргъан  тюрлю-тюрлю  конференциягъа къатышып, алада да атын махтау бла айтдырады. Алгъаракълада уа ол хазырлагъан «Оценка факторов риска в ранней диагностике сахарного диабета» темагъа докладына белгили академикле эслерин бургъандыла.

Аскер ишге толусунлай берилгени эмда  аскер хазырлыкъда жетишимлери, аскер борчланы дайым да толтурургъа хазырлыгъы, подразделение къуралгъанлы 70 жыл толгъаны бла байламлы жаш  хауа-десант аскерлени  командующиси  А.Сердюков къол салгъан грамотагъа да тийишли болгъанды. Чочайланы Зауур аскер къуллугъун бет жарыкълы толтургъанына аны ата-анасы, жууугъу-тенги да  айтып-айтмазча ёхтемленедиле.