Уллайгъан адамланы къоркъуусузлукъларын жалчытыугъа уллу магъана бериледи

Уллайгъан адамланы къоркъуусузлукъларын жалчытыу къырал органланы баш борчларындан бирлери болгъанлай къалады.

Жыл санлары жетген адамлагъа, артыкъда бек саулукълары  осалгъа кетгенлеге, бир къауумла аманлыкъчы ишлени этерге ёчдюле.  Ол себепден, уллайгъан адамланы къоркъуусузлукъларына  уллу магъана бёлюнеди.  Аны бла байламлы Къабарты-Малкъар Республиканы прокуратурасы адамланы ол къауумуна бир ненча рекомендациягъа эс бурургъа чакъырады.  Алдауукъчулагъа алдатмаз ючюн не этерге керекди:         

Пенсиячыгъа социальный тёлеулеринги алыргъа кел деп, анга Пенсия фонддан бир заманда да сёлеширик тюйюлдюле, неда сиз ахчагъызны  бир билмеген счётха ётдюрюгюз деп да. Аны бир кезиуде да унутургъа жарамайды. Банкда болгъан ахчаларыгъызны счётларын не да кодларын да бир адамгъа да билдирмегиз.

Фатарда кесигиз жашай эсегиз, танымагъан адамлагъа кёп хапар айта турмагъыз, ол санда белгисиз адамланы юйюгюзге чакъырыргъа жарамайды, не да ала бла анда тюбешмегиз.

Дагъыда фатарыгъызны билмеген инсанлагъа  болжал халда жашаргъа бермегиз, хоншулагъа окъуна кире эсегиз, юйюгюзню эшиклерин киритге жабыгъыз. Эшигигизни ачхычларын бош жерде къоймагъыз. Ахчагъызны шкафлада, шкатулкалада эм алагъа ушаш жерледе тутмагъыз, тонаучула юйге кирселе, терк окъуна ахчаны табып, алып кетмезча. Уллу сумма ахчагъыз бар эсе, аны банкда тутаргъа керекди.

Фатарыгъызны эшигин танымагъан адамлагъа ачмагъыз, ол санда тюрлю-тюрлю социальный службаланы келечилерибиз деп айтхан эселе да. Полицияны келечисини, социальный службаланы, пенсионный фондну телефонлары жазылып биргегизге болсун. Келген адам къырал организацияны келечисиме дей эсе, аны тукъумун, атын, къуллугъун, не мурат бла келгенин, эшикни «кёзчюгюне» къайда ишлегенине берилген шагъатлыкъ къагъытын кёргюзтюрге тийишлиди.

Сизге келген адам фатарыгъызгъа кирирге къаты сюе эсе, алайгъа хоншуланы чакъырыгъыз, келсинле да халгъа къарасынла.  Жууукъ адамыгъызгъа да билдиригиз ол «келгенни» юсюнден, аны бла телефон байламлыкъда болугъуз.

Танымагъан адамгъа паспортны, СНИЛС, пенсия, ветеран  эм башха къагъытларыгъызны  бермегиз. Бир заманда да бланклагъа, документлеге къол ызыгъызны салмагъаз. Сатыу-алыу фирмаланы келечилерибиз деп дарманла, продуктла, юйде хайырланнган тюрлю-тюрлю техниканы  сатханладан зат сатып алмагъыз.

Юйюгюзге келген сизге шагъырей болмагъан адамны юсюнден полициягъа билдирирге боллукъсуз. Сизге телефон бла сёлешип, жууукъ адамыгъыз ауругъан этгенди, неда больницада жатады деп ахча умут эте эселе, ала алдауукъчула болгъанларына толу ийнаныгъыз. Танымагъан адамгъа ахчаны бир заманда да бермегиз!

Уллу кёллю болмагъыз, бир затны юсюнден  (ахчала бла байламы) жумуш этерик эсегиз,  жууукъ адамларыгъызгъа сёлешигиз эм оноулашыгъыз. Ким биледи, сизни урлап, неда тонап кетген эселе, созмагъанлай полициягъа 102 неда 112 телефонла бла сёлешигиз.

Белгилерчады, башда сагъынылгъан затла бла байламлы этилген аманлыкъчы ишлени ачыкълагъан къыйын болгъанын, нек дегенде уллайгъан адамланы асламысы аманлыкъчыланы бет сыфатларын эслерине хазна келтиралмайдыла, кёп  затны унутадыла. Аманлыкъчыланы сыфатларын эсигизде тутаргъа кюрешигиз, ол заманда аланы излеп тапхан тынч боллукъду.