Хар кимге да хатер этиу - жюрегини излемиди

Бюгюнлюкде заман да ёзгере, аслам къыйматха кёз къарам да тюрлене баргъанлыкъгъа, тёгерекде тиширыу биригиуле кеслерини ишлерин тохтатмай, жамауатдан ыразылыкъ табадыла. Зольск районну Хабаз элини аллай совети да ол сандады, аны кесине да Ахматланы Аминат (халкъ а аны Люба деп таныйды) башчылыкъ этеди. Андан сора да, Жер-жерли самоуправленияны советини депутатыды.

Ушагъыбызны уа ол: «Тиширыуланы къолларындан кёп зат келеди, хар ахшылыкъны, жангычылыкъны да башламчысы аладыла. Биз бир акъыллы, оюмлу да болуп ишлесег а иги кесек  жумушну мажараллыкъбыз», -деген сёзле бла башлагъан эди. Анга тынгылай, инсан къолуна алгъан  ишни сюйсе, анга кёлю бла берилсе, бютюнда къатындагъылагъа болушлукъ этерге ашыкъса, кертиси бла да, муратына жетала болур деген сагъыш да бийлейди.

Организацияда бюгюнлюкде онеки адам барды. Ала элде болушлукъ кереклилеге, къолайсызлагъа, кеслеринлей тургъан къартлагъа, сакъатлагъа  да аны тапдырадыла. Атасыз-анасыз да къалгъан ёксюзле уа эки юйюр боладыла. Алагъа да тиширыула къайгъыргъанлай турадыла.

Кертиди, бюгюнлюкде, Аллахха шукур, гыржын ким да таба болур, алай жашауда башха тюрлю къыйматла да бардыла. Совет да сабийлени, абаданланы, бирсилени да кёллерин кётюре, алагъа байрамла, концертле, конкурсла да къурайды, саугъала бла да къууандырады. Тиширыуланы башламчылыкъларына элни администрациясыны таматасы Тюбейланы Марина,  сагъынылгъан районну башчысы Руслан Гятов да тутхучлулукъ этедиле.

Аланы юслеринден айта, Аминат былай дейди: «Аллай, жамауат ючюн къайгъыргъанланы сыйлагъан къыйын тюйюлдю». Эл талай заманны суу къытлыкъдан къыйналып тургъанын эсгертип, бюгюнлюкде ол проблема кетерилгенин, суу кеси да тазалыгъы бла дунияда экинчи жерде болгъанын да айтып, ыспас этеди. Андан сора да, Хабазны жоллары тапландырылгъандыла. Озгъан жылда Малкъар халкъны къыраллыгъы къайтарылгъан кюнню байрамында уа район администрацияны таматасы школгъа жангы улоуну саугъалагъанды. Алгъаракълада мында амбулатория да ачылгъан эди.

Энди уа эллиле Маданият юйлери болса сюедиле. Нек дегенде ол бюгюнлюкде осал халдады, аны себепли тиширыуланы совети, бирсиле да байрамланы анда угъай, школда къурайдыла. Жыйылыуланы уа эл администрацияны мекямында бардырадыла. Аны себепли барысы да Культура дворецни жангыртылырын ашыгъып сакълайдыла.

Аминат кеси да Хабазда туугъанды. Уллу юйюрде ёсгенди. Мектепни тауусханындан сора анга окъургъа тюшмегенди. Эгечи, къарындашы ол кезиуде студентле болуп, ата-анасына къыйын  тюшгени себепли, ол алагъа болушлукъ этип, Нальчикде, элде да кийим тикген цехледе уруннганды.

Къадары алай бурулгъанына  сокъуранмагъанлыкъгъа, бюгюнлюкде тиширыугъа окъургъа, билим алыргъа кереклисине уа толу ийнанады. «Эр киши кесини кючюн-къарыуун хайырланып, алай бла да ишлеяллыкъды. Бизни уа жокъду аллай онгубуз, саулугъум къойса, шёндю окъуна бир жерге окъургъа кирлик эдим»,- дейди.

Алай эсе да, огъурлу ана, баш иеси Ахматланы Магомет бла бирге юч сабийни ёсдюре, аланы билимни жолуна салгъандыла. Таматалары Ибрагим Саратовда инженер-механик усталыкъны алгъанды. Фатимат а Нальчикде Сосудистый арада ишлейди.  Ол мектепде  иги окъугъаны ючюн КъМР-ни ол замандагъы президенти Арсен Каноковну Жангы  жылда школчула бла тюбешиулерине да келген эди. Кичилери  Диана да бешлеге окъуйду. Онбиринчи классны таууса турады. Толу юйюрню анасы ийменнгенин жашырмаса да, ёсдюргенлери билим алгъанларына уа къууанады.

Жашауу, къадары да алай тап къуралгъаныны, сабийле да тюз жол бла  баргъаныны сылтауун а ол биргесине жыйырма жылдан асламны жашагъан къайын анасы Кучукланы Аминатны ахшылыгъында кёреди. Ариу сёзю, къылыгъы бла да барысын да аслам затха юйретгенин, тюшюндюргенин да белгилейди.

Кеси да эл аллында урунуп, жер-жерли самоуправленияны советини депутаты да болуп тургъан жашаулу тиширыу, келини бардыргъан жумушну да керек болгъанын, бирсилеге болушургъа тийишлисин, айхай да, кимден да иги  ангылайды, биледи.

Ётюрюкден не асыу, иги кесек заманны организацияны иши тохтап да тургъанды. Ол бюгюнлюкде жангыртылып, жумушун алай бардырады. Жаланда элни ичи бла чекленип къалмай, аны келечилери районда, республикада къуралгъан жумушлагъа да къатышадыла. Жууукъ заманда Нальчикде къартла, инвалидле, сабийчикле да тургъан интернатланы, юйлени да жокълар умутлудула. Андан сора да, «Юлгюлю юйюр», «Жылны анасы» деген эришиулени бардыргъанлай турады.

Советни таматасы аллай иш бла кюрешгени аны кесини инсанча ёсюуюне,  айныууна да себепли болгъанын, биреуге окъуна эс тапдыргъанлары кёлюн кётюргенин да букъдурмайды. Аталарыны-аналарыны экисини да къатларында толу юйюрледе ёсгенле башхала болгъанларына, ала жамауатха да энчилик бла къошулгъанларына ийнанады.

Жюрегинде умутуну юсюнден айта, хар арбазгъа монглукъ тилейди. Адамланы арасында сюймеклик, хурмет, жандауурлукъ да кючленип, къартла-къарыусузла, сабийле, сакъатла да атылмай, хар ким да юйюр жылыуну, жюрек жумушакълыкъны сезип жашарларын излейди.