Поликлиника уллу эмда бюгюннгю излемлеге келиширча боллукъду

Къабарты-Малкъарда  сменагъа беш жюз адамгъа къарарча поликлиника ишленирикди. Бюгюнлюкде аны къурулушун башларча жерни  хазырлай  турадыла. Быллай стационарны болургъа кереклисини юсюнден  быйыл июньда республиканы Башчысы Казбек Коков да айтханды.  Анга  РФ-ны Президенти Владимир Путинни  саулукъ сакълауну биринчи звеносун игилендирирча буйругъуну  чеклеринде федерал даражада къаралыб  къабыл этилгенди.  Аны юсюнден бизге КъМР-ны Башчысыны бла Правительствосуну пресс-службасындан билдиргендиле.

Проект федер ахчагъа бардырыллыкъды. Республикада эм уллу поликлиниканы къурулушуна 700 миллиондан аслам сом бёлюнюрюкдю. Ол Нальчикни 1-чи номерли клиника больницасыны жеринде  ишленирикди. Бюгюнлюкде подряд организация   тозурагъан корпусланы  кетерип кюрешеди. 

Жангы 1-чи номерли поликлиниканы  уллулугъу сегиз  минг квадрат метрден аслам боллукъду. Бусагъатда аны участогуна  80 минг адамгъа жууукъ киреди.  Эски учреждение 1961 жылдан бери ишлейди. Анга  алгъадан   сюелген мекамланы бири берилген эди. Бюгюнлюкде уа  саусузланы санына танг къошулгъаны ючюн  тийишлисича къараргъа онг жокъду.

Поликниканы регистратура,  терапия, профилактика,  терк болушлукъ берген, кючлю лабор-диагностика  бёлюмлери, специалистле олтургъан,  процедура эм прививка бардыргъан кабинетлери, медицина усталыкъгъа окъугъан студентлеге классла бла аудиториялары,  саусузлагъа  кюндюз жатарча  стационары, административ-мюлк бёлюмю да боллукъду.