Хунерли жаш адамлагъа билеклик

Шимал Кавказ республикалада «СКФО-ну алчыларыны школу» проектни бардырып башлагъандыла. Ол жаш тёлюню Битеуроссей миллет аралы союзуну проектиди. Кеси да хунерли жаш адамланы кеслерин кёргюзтюрге себеплик этиу хыйсап бла къуралгъанды, дегендиле «Иш кёллю Россей» жамауат организацияны Къабарты-Малкъарда бёлюмюнде.

Бу ишни чеклеринде СКФО-да хар субъектде да насийхатчыланы биригиулери къуралгъандыла. Аланы санында алимле, инженерле, it-сферада уруннган специалистле, жетишимли предпринимательле, жамауат къуллукъчула эмда юристле бардыла. Бизни республиканы атындан анга: «Иш кёллю Россейни» регионда бёлюмюню келечиси, бизнесни айнытыу жаны бла эксперт Гузеланы Индира, «Маяк» санаторийни башчысы Мамайланы Галина, «Автобытсервис» ООО-ну башчысы Владислав Можгин, «Сиринж» предприятияны таматасы Артур Гудов, «Кватро» билим бериу-илму араны таматасы Инна Мирзоева эм сагъынылгъан бёлюмню башчысыны экинчиси Бетал Ивазов къатышадыла. Ала сейирли оюмлары эмда проектлери болгъан, алай аланы жашауда бардырыргъа къолларындан келмеген, билимлери неда онглары жетмеген хунерли жаш тёлюге насийхатлыкъ этерикдиле.

Конкурс айырыуладан сора хар субъектден да проектге 60 адамны сайларыкъдыла. Алагъа деп Нальчикде, Пятигорскеде, Черкесскде, Владикавказда, Магасда, Грозныйде эмда Махачкалада «KavNetworking» деген тюбешиуле бардырыллыкъдыла. Ызы бла экспертле, кеслерине бир ненчашар адамны сайлап, алагъа жарым жылны ичинде насийхатлыкъ этерикдиле эмда онлайн-тренингле бардырлыкъдыла.