Жукъгъан ауруу бла байламлы болумну юсюнден сёлешгендиле

Районда эпидемиология болумну эмда COVID-19 коронавирус инфекцияны жайылыууна къажау амалланы юслеринден бу тийрени башха-башха эллеринде озгъан тюбешиуледе сёз баргъанды. Жыйылыулагъа Жер-жерли самоуправленияны советлерини депутатлары, билим бериу махкемелени келечилери, бирсиле да келгендиле. Ала бла Элбрус районну администрациясыны башчысыны биринчи орунбасары Арслан Улимбашев, сагъынылгъан районну ара больницасыны баш врачыны къуллугъун болжаллы халда толтургъан Тебердиланы Зайнаф, Роспотребнадзорну КъМР-де управлениясыны Элбрус районда территориялы бёлюмюню таматасыны къуллугъун толтургъан Юлия Кримготова, билим бериу управленияны башчысы Атаккуланы Нуржан, бирсиле да къатышхандыла.

Тюбешиуледе халкъгъа дарман салдырыу жаны бла болушлукъгъа мобил къауумланы къурауну, жамауат аслам халда жыйылгъан мероприятияланы тыйыуну, Роспотребнадзорну ковидни профилактикасы бла байламлы рекомендацияларын толтурууну юслеринден айтылгъанды. Окъуу учрежденияланы таматаларын Мектепледе эмда школгъа дери билим берген жерледе эпидемиология къаты контроль этерге чакъыргъандыла.

«Келир заманны билети»

Алтынчы-онбиринчи класслагъа жюрюгенлени усталыкълагъа эрттеден тюшюндюрюу жаны бла проект «Келир заманнга билет» деген ат бла къуралгъанды. Ол кеси да «Билим бериу» миллет проектни «Хар сабийни жетишими» деген федерал проектини чеклеринде саулай къыралда жашауда бардырылады. Анга уа Тырныауузну Отарланы Керим атлы биринчи номерли лицейи къатышады.

Анда уа энчи къуралгъан кёп функциялы информация – сервис онлайн – платформаны хайырланнган эки жюзден аслам адам регистрацияны ётгенди. Мында усталыкъгъа юйретген материалла, диагностикалы данныйле, окъуучуланы бла педагог-навигаторланы кабинетлери, расписания (усталыкъгъа тюшюндюрюу жаны бла) бардыла. Окъуучуланы усталыкъ сайлау бла байламлы кёп сейир проектле сакълайдыла. Сынамлы юйретиучюлени башчылыкъ этиулери бла ала ол неда бу жаны бла кеслерини къаллай хунерлери болгъанын ачыкълап, энчи жарашдырылгъан окъуу планнга тийишлиликде эсгертиулени да алаллыкъдыла. Шёндюге дери да профориентациядан бир ненча дерс озгъанды, школчула анкетированиядан ётгендиле, берилген фильмлеге къарагъандыла эмда кёрген затларыны юслеринден кёз къарамларын билдиргендиле. Алда уа энди диагностикалы дерсле эмда практикалы мероприятияла боллукъдула. Ала уа башха-башха форматлада къуралып озарыкъдыла.

Сейир затланы юсюнден хапарлы бола

Отарланы Омар атлы район краеведение музей тарыхны сакълау жаны бла уллу ишни бардырады. Бусагъатда анда «Элбрус районну эллерини тарыхлары» деген ат бла жыйымдыкъгъа жораланнган ингирлени бир ненчасы озгъанды. Аланы кезиуюнде уа окъуучула Бахсан ауузну, башха-башха заманлада болуп ётген затла бла шагъырейленедиле.

Алып айтханда, ала эрттегили эски эллени юслеринден, ол тийрелени атлары къалай, къайсы тукъумладан къуралгъанларын да биледиле. Музейни ишчилери «Бахсан аууз» деген ат бла энчи кёрмючню да жарашдыргъандыла. Сагъынылгъан тематикагъа аталгъан тюбешиуле жылны аягъына дери бардырыллыкъдыла. Аланы хайыры бла уа жаш тёлю иги да кёп затны биллиги, жангы темалагъа тюшюнюрюгю да баямды.