Къабарты-Малкъарда кадет класс ачылгъанды

Казбек Коков  Н.Г. Калюжный атлы 7-чи номерли битеулю билим берген орта школну 5-чи «К» классыны окъуучуларын кадетлеге алыу тюбешиуге къатышханды. Жыйылыу КъМР-де Ич ишле министерствону мекямында бардырылгъанды, 29 жангы кадет антларын айтхандыла эм удостоверенияларын алгъандыла.

Былтыр мектепде КъМР-де МВД-ны башламчылыгъы бла биринчи кадет класс ачылгъанды, проект сабийлени эм ата-аналаны араларында ахшыгъа саналгъанды.

Республиканы оноучусу алгъышлау сёзюнде былай белгилегенди: «Кадет къымылдауну Россейде экижюзжыллыкъ тарыхы барды эм ол сабийлерибизни бюгюнлюкде патриотлукъ низамда бла ёз жерге къуллукъ этиу жорукълада юйретирге онг береди. Кадет къымылдау республикада тири айный баргъаны къууандырады». Казбек Коков бу ишге тири себеплик этгенлеге ыразылыгъын билдиргенди, жаш кадетлени ол даражалы атны сый-намыс бла жюрютюрге чакъыргъанды.

КъМР-де ич ишле министр полицияны генерал-майору Василий Павлов  республиканы таматаларына кадет къымылдауну  айнытыугъа юлюш къошханлары ючюн ыспас этгенди. Ол билим бериу махкемеде кадетлени окъутуу эм юйретиу амалланы юсюнден хапарлагъанды: «Кадетлени окъутурча эм юйретирча комплексли программа жарашдырылып бардырылады, анга кёре россей милицияны эм полицияны къуралыууну, аны структура бёлюмлерини эм службаларыны ызларыны тарыхы да окъутулады».

КъМР-ни жарыкъландырыу, илму эм жаш тёлюню ишлери жаны бла министри Анзор Езаов, мектепни директору Анзор Харзинов, КъМР-де МВД-ны Жамауат советини таматасы Руслан Макушев да жаш кадетлеге насийхат сёзле айтхандыла.