Байрамны чегинде чынла берилгендиле

        МВД-ны республикада управлениясында Ич ишле органланы келечисини кюнюн белгилегендиле.

         Байрамны Россейни ич ишле министр полицияны генералы Владимир Колокольцев бардыргъанды. Анга видеоконференцсвязь амал бла ведомствону регионда управлениясыны таматасы полицияны генерал-майору Василий Павлов да къатышханды.

         Министерствону ара аппаратыны эм жер-жерли органларыны Россейни Президентини буйругъу бла энчи чынла берилген башчыларын алгъышлай, Владимир Колокольцев къыралны Башчысы аланы ишлерине, таматалыкъ эте билгенлерине,  бойсунууларында болгъан бёлюмле салыннган борчланы тынгылы тамамлагъанлары  бийик багъа бичгенин билдиргенди. Хар бирибизге да ол магъаналы ишди, харкюнлюк къыйын ишибизни, право низамны сакълаугъа энчи жууаплылыгъыбызны эсебиди, дегенди ол.

         МВД-ны башчысы къырал саугъалагъа бла ведомствону айырмалылыкъны белгилерине тийишли болгъан, усталыкъларында эм игилеге саналгъан полициячыланы, окъууда отличниклени белгилегенди.

         Ызы бла болгъан байрамгъа Къабарты-Малкъарны экономика эм жамауат къоркъуусузлукъну жалчытыу советини секретары Казбек Татуев, Россейни Президентини СКФО-да толу эркинликли келечисини аппаратыны баш федерал инспектору Тимур Макоев бла МВД-ны Краснодарда университетини филиалыны квалификацияны ёсдюрюуню Север Кавказ институтуну башчысы Заурби Шхагапсоев къатышхандыла.

         Энчи составны эм эм ич ишле органланы ветеранларын алгъышлай, Василий Павлов алагъа кийик саулукъ, юйюрлеринде насып, ишлеринде жетишимле тежегенди. Ол полициячылагъа амалыкъчылыкъ бла къажау кюреш бардырыугъа къошумчулукълары, миллет сейирлени къоруулаугъа эм адамланы тынчлыкъларын бла къоркъуусузлукъларын къоруулаугъа салгъан къыйынлары ючюн ыразылыгъын билдиргенди. «Мындан арысында да бийик усталыгъыгъыз бла ишигигизге кертичилигигиз ич ишле органлагъа салыннган къыйын борчланы тамамларгъа болушругъуна ишеклигим жокъду», - дегенди ол.

         Алгъышлауладан сора айырмалы  ишчилени саугъалагъандыла. Къазакъ жаш тёлюню Юбилей Евразия форумун бардырыуда жамауат низамны бла къоркъуусузлукъну сакълаугъа  къошумчулукълары ючюн Россейни Президентини СКФО-да толу эркинликли келечисини ыразылыкъ къагъытларына КъМР-де МВД-ны полициясыны башчысыны орунбасары полицияны полковниги Анахаланы Кязим, МВД-ны Нальчикде управлениясыны башчысы полицияны полковниги Хачим Шебзухов, МВД-ны республикада наркотиклени сатыу-алыугъа контроль этиу управлениясыны бёлюмюню башчысыны орунбасары Олег Никишин тийишли болгъандыла.

Россейни МВД-сыны буйругъу бла «полицияны полковниги» деген чынла МВД-ни энчи къоркъуусузлукъ жаны бла бёлюмюню опреатив-излеу частыны башчысыны орунбасары Арсен Кашежевге бла КъМР-де МВД-ны ГИБДД-сыны управлениясыны башчысыны орунбасары Дмитрий Сухориченкогъа берилгендиле. Республикада МВД-ны Тылыны башчысы Сергей Корниенко бла министерствону Нальчикде управлениясыны башчысыны орунбасары Аскер Докшукин «ич службаны полковниги» деген чынлагъа тийишли болгъандыла.