Агъачланы айнытыуну къайгъысын кёре

Быйыл 13 ноябрьде  Къабарты-Малкъар «Экология» миллет проектни чеклеринде бардырылгъан  «Агъачланы сакълау» битеуроссей акциягъа къошуллукъду.   Ол «Эсгериуню бахчасы» волонтёр организацияны башламчылыгъы бла озарыкъды. Бизни республикада уа анга Табийгъат байлыкъла эмда экология министерство башчылыкъ этеди.

Акцияны  магъанасы тёгерек-башда, ол санда шахар тийреледе   жашиллендирилген жерлени сакъларгъа эм айнытыргъады.  Анга  ноябрьни ахырына дери муниципалитетлени барысы да къатышырыкъдыла. 

Ол санда  Нальчикде Хорламны паркында республиканы агъач питомнигинде ёсдюрюлген 250 чакълы эмен, кюйрюч эм акъагъач терекчиклени орнатырыкъдыла. Анга  КъМР-ни табийгъат байлыкъла эмда экология  министрини Шауаланы Илиясны башчылыгъы бла  ведомствону, агъач мюлклени келечилери эм волонтёрла къатышырыкъдыла. Быйыл ишлени бардырыргъа федерал бюджетден  регионнга 31 миллион сом бёлюннгенди.  Проектге кёре  жаз башында  районлада 420 минг айырмалы  терекчик салыннгынды.

 Эсге сала айтсакъ, «Агъачны сакълау» акция быйыл бла ючюнчю кере ётерикди. Эки жылны ичинде субъектледе 80 миллиондан аслам терекчик орнатылгъанды. Ол ыз а жамауатны, ол санда жаш тёлюню, табийгъатха аяулу кёзден къараууна ахшы себеплик этеди. 

Магометланы Сулейман.
Поделиться: