Эл мюлкде жангы амалланы хайырын кёрюрге итиниулюк

Республиканы эл мюлк бёлюмюнде мирзеу ёсдюрюуге не заманда да уллу магъана берилгенди. Аны кёбейтиуде баш жерни тирликлиликни игилендириу алады. Кюзлюклени, башха мирзеулюк битимлени тирлиги, урлукъну сортуна, ёсдюрюуде амаллагъа, къаллай минерал семиртгичле хайырланылгъанына кёре болады.

«Россельхоз араны» Къабарты-Малкъарда бёлюмюню башчысы Хасанбий Куржиев айтханнга кёре, бизни регионда эл мюлк товарла чыгъарыучуланы кёпден-кёбю ишде инновациялы амалланы сингдире барадыла. Аны хайырындан ала бир гектардан кюзлюкледен - 40-50 центнер, бирде уа анда да аслам аладыла.

- Кюзлюклени ичинде баш магъананы аллай будайгъа берирге тийишлиди, - дейди Хасанбий Гидович. – Андан этилген ун ётмек бишириуде, татлы ашарыкъла чыгъарыуда хайырланылады. Иги тирлик алырча урлукъну сортун, аны себиу кезиуню да жерине кёре сайларгъа керекди. Жер башында хауа аз-аздан жылына баргъанын эсге алып, будайны ёсдюрюу амалланы да тюрлендирирге керекди.

Ахыр жыллада республикада нартюх ёсдюрюлген жерлени ёлчеми кёбейгенди, бюгюнлюкде ол 138,1 минг гектар болады. Аны жыйгъандан сора уа ол жерледе кюзлюк будай себиледи. Алай этилгени ючюн мирзеуню тирликлилиги, качествосу да осалыракъ боладыла.

Кюзлюк будайгъа дери ол жерде къудору, рапс, картоф, соя, мал ашха жараулу нартюх ёсдюрсе игиди. Алай болса, будайны тирликлилиги 10-12 центнерге кёбейеди. Мында: Алексеич, Антонина, Ахмат, Баграт, Безостая 100, Бумба, Герда, Тимирязевка 150 сортланы себерге боллукъду. Бригада, Васса, Гомер, Гром, Иришка, Калым, Лауреат, Нота, Стан, Краснодарская 99 сортланы уа жарамайды.

Къаллай урлукъ да себилсин, сабанлада агротехника жумушла тамам этилмеселе иги тирлик боллукъ тюйюлдю. Дагъыда ишни заманында тамамларгъа керекди.

КъМР-ни Эл мюлк институтуну специалистлери, мирзеуню П. П. Лукьяненко атлы миллет арасыны келечилери бла бирге, кюзлюк будайны, арпаны эмда тритикале битимни бизни жерлеге келишген сортларын жарашдыргъандыла. Ала ауруулагъа, заранлы къурт-къумурсхалагъа да чыдамлыдыла. Хасанбий Куржиев оюм этгенича, аланы хайырланыу кюзлюклени производствосун кёбейтирге, мирзеуню качествосун да игилендирирге онг берликди.