Сайлагъан усталыгъына кертичилей къалгъан

      Россейни Ич ишле министерствосуну КъМР-ни Черек районунда бёлюмюню таматасыны болушлукъчусу – энчи къауум бла ишлеу жаны бла бёлюмню таматасы ич ишле службаны полковниги Башийланы Аслижан жашаууну асламын сюйген усталыгъына жоралагъанды. Жыйырма тёрт жылны ичинде ол кадрла бла байламлы къуллугъун бир башхагъа алышмай келеди.

    Анжела Анатольевнаны бу ызны сайлагъаны да бошдан болмагъанды. Аны атасы Анатолий Абдурахманович Башиев ич ишлени органларында тюрлю-тюрлю къуллукълада 32 жылны уруннганды. Ол Ростовну юристле хазырлагъан академиясыны Нальчикдеги филиалыны кафедрасыны таматасы  болуп да ишлегенди. Пенсиягъа ол милицияны полковниги деген чында кетгенди. Анасы Лидия Ахматовна да милицияны отставкада подполковнигиди, республиканы ГИБДД-ны службасыны ветераныды. Аслижан да аланы ызлары бла барыргъа сюйгенин билдиргенде, ала аны сайламына угъай демей, билеклик этгендиле.

   Ол, 1995 жылда КъМКъУ-ну тыш къыраллы тилле факультетин бошагъандан сора, ич ишлени органларында урунургъа сюйюп, ары документлерин береди. Бек биринчиден, аны  стажёр этип аладыла. Юч айдан а таулу къызны КъМР-ни Ич ишле министерствосуну къуллукъну ётюу эм учётну бардырыу бёлюмюню инспекторуну къуллугъуна ётдюредиле. Аны ишине толусунлай берилгенин, эбине тюшюннгенин таматала эслейдиле. Сора, кёп да бармай, Аслижан Анатольевна ол бёлюмге башчылыкъ этип башлайды.

    Бу ызны сайлагъан къыз тийишли билим алыргъа керек болгъанын ангылап, Россейни МВД-ны  Краснодардагъы академиясыны «Юриспруденция» факультетине окъургъа киреди. Алай бла анга ишин бла окъууун бирден бардырыргъа тюшеди. Вузну ол 2004 жылда бошайды. Хар жангы къуллукъда да Аслижан Анатольевна ол бёлюмлени ишлерин тап къурап, юлгюге айтылгъанлай тургъанды.

    Тенглери чертгеннге кёре, 2011 жылда милицияны атын полициягъа тюрлендиргенде, аны сынамы саулай да республикагъа хайырлы болгъанды. Бу жумушну тийишли ётюуюнде Башийланы Аслижанны къыйыны бек уллуду.

  Кёп да бармай аны Ич ишле министерствону кадрла жаны  бла бёлюмюне таматагъа саладыла. Эки жылдан а – Энчи къауум бла ишлеу жаны бла управленияны таматасыны орунбасарына. Сынамлы специалистге 2015 жылда МВД-ны КъМР-да Экстремизмге къажау кюреш бардырыу арасыны кадрла бла байламлы бёлюмюн ышанадыла. Бир жылдан а аны бу ыз бла Черек районнга кёчюредиле.

    Кёп жылланы бет жарыкълы уруна келгени ючюн Аслижан Анатольевна ведомстволу саугъала бла да белгиленнгенди. « За отличие в службе» майдал, «За верность долгу», «За отличную службу в МВД» белгиле эм Россейни Ич ишле министерствосуну Сыйлы грамотасы бла да саугъаланнганды.

   Ич ишле службаны полковниги Башийланы Аслижанны башчылыгъында ол башчылыкъ этген бёлюмню специалистлери къуллукъларын толтургъан полициячыланы энчи ишлерин тап халда тутадыла, ишлеп кетген ветеранла бла да байламлыкъ жюрютедиле. Органлагъа ишге кирирге сюйген кандидатладан тынгылы сайлау бардырадыла. Ишге тохташханланы да усталыкъларын ёсдюрюуге энчи эс бёледиле.

  Сайлагъан ызында анга юлгю болгъан, болушлукъ этген ветеранланы эсгере, Аслижан Анатольевна аланы хар бирини да атларын жюрек жылыу бла сагъынады. Республиканы Ич ишле министерствосуну кадрла бла байламлы бёлюмюне тюрлю-тюрлю жыллада таматалыкъ этип тургъан Виктор Сергеевич Поповну бла Вячеслав Заурбиевич Назрановну къолларында ишлерге тюшгенине ол бек ыразыды. Бу адамла сынамларын, билимлерин да къызгъанмай, жаш специалистни ишни тап къураргъа юйретгендиле.

   Офицер чертгеннге кёре, иш кёп болса да, ол къыралыбызны сейир жерлеринде болуп солургъа бек сюеди. Дагъыда белгили философланы бла классиклени чыгъармаларын окъургъа заман табаргъа кюрешеди.

  - Э. Ремаркны, А. Камюну, А.Шопенгауэрни чыгъармаларын къайтарып окъуп турургъа хазырма, - дейди Аслижан Анатольевна.

  Бизни бюгюннгю жигитибизни алда кёп жумушла сакълайдыла. Аны къолунда ишлегенлени уа таматаларындан салыннган борчланы тынгылы толтуруугъа юйренир онглары барды. Башийланы Аслижан чынтты шуёх эм аламат оноучуду.