Поликлиниканы жангыртадыла

Нальчикде экинчи номерли поликлиникада тынгылы жангыртыу ишле барадыла. Бу объект озгъан ёмюрню сексенинчи жылларыны ахырында ишленнгенди. Андан бери анга ремонт бир этилмегенди, аны ючюн ол кёбюсюнде шёндюгю излемлеге келишмейди. Аны юсюндан КъМР-ни Саулукъ сакълау министерствосунда да айтадыла.

Бу кюнледе ишчиле аны отоу тюплерин къобарып кетергендиле, жылытыу системасын да жангыртхандыла. Энди электрокюч сетьни алыша турадыла. Объектде терезелери бла эшиклери жангыла, отоуларыны башы уа бийигирек боллукъдула. Ызы бла поликлиникада шёндюгю оборудование орнатырыкъдыла. Сёз ючюн, хирургия кабинетде гастро- эмда колоноскопия этерге жараулу эндоскоп ишлеп тебирерикди. Ремонт тийишли оборудованияны орнатыу бла байламлы излемлеге кёре тамамланады.

Поликлиниканы тышкёрюмдюсю да тюрленирикди. Анда да жангыртыу ишле барадыла. Ремонтну подряд организация келир жыл августда бошаргъа дейди.

Быллай ишле бардырылгъанлыкъгъа, анда саусузлагъа къарау тохтамайды; поликлиника 76 минг адамны жумушларына къарайды. Вакцина салдыргъан кабинет да алгъынча ишлейди. Анда прививканы кюн сайын эрттенликде сагъат сегизден башлап, ингирде алтыгъа дери этерге боллукъду.

Улбашланы Мурат хазырлагъанды.
Поделиться: