Къобузчула, жырчыла да сынашхандыла

Нальчикде  Искусстволаны Шимал-Кавказ институтуну  культура колледжинде    «Чыгъармачылыкъ бийикликле» деген  конкурс  баргъанды. Анга  Шимал Осетия-Аланиядан, Дагъыстандан, Чеченден, Ингушетиядан, Къарачай-Черкесден, Къабарты-Малкъардан, Дондагъы Ростовдан, Ставрополь, Краснодар крайладан да  150-ден  артыкъ адам къатышханды. Аланы араларында  сабий музыка школланы окъуучулары, колледжлени студентлери, устазлары да болгъандыла.

Алагъа  багъа бергенлени къауумуна уа  даражалы адамла киргендиле: ол санда  профессор Фридрих  Липс, РФ-ни халкъ артисти  Виталий Гунин, СКГИИ-ни культура колледжини директору, КъМР-ни культурасыны сыйлы къуллукъчусу  Валерий  Шарибов, Дагъыстан Республиканы культурасыны сыйлы къуллукъчусу, СКГИИ-де халкъ инструментле  кафедраны таматасы  Мусабег Ахмедагаев,  , Ростовда  искусстволаны колледжинде миллет къыл къобузланы  бёлюмюню таматасы  Галина Шишкина.

Конкурс башланырдан алгъа,  СКГИИ-ни директору, искусствоведенияны доктору,  КъМР-ни искусстволарыны сыйлы къуллукъчусу Рахайланы Анатолий  хычыуун жумуш  тамамлагъанды.  Белгили  музыкант, илму къуллукъчу Фридрих Робертович Липсге  «СКГИИ-ни  сыйлы профессору» деген ат аталгъанын билдирип, анга шагъатлыкъ этген къагъытны бергенди.  «Бюгюнлюкде къобуз согъууну школуну аты Фридрих Липсни хайырындан битеу дуниягъа айтылгъанды.  Аны илму, методика  изданиялары уа  педагогланы бла студентлени  стол китапларына болгъандыла»,-дегенди..

Конкурсну кезиуюнде уа кёп авторланы чыгъармалары, халкъ макъамла, жырла да эшитилгендиле.  Ахырында  анга  къатышханланы барына да  сертификатла,  хорлагъанлагъа дипломла, саугъала да берилгендиле.  Бизни жерлешибиз   Рашид Бекеровну да белгилерчады. Ол  къобузгъа бла  инструментли оркестрге  деп жазгъан  кавказ макъамланы жыйымдыгъын   преподаватели Мусабег Ахмедагаевге жоралагъанды. Аны солисти  СКГИИ-ни  халкъ инструментлени кафедрасыны доценти, халкъла аралы конкурсланы лауреаты  Малкъарланы Мурат эди.